يندونەزييانىڭ دجاكارتا جەنە پالەمبانگ قالالارىندا ۇيىمداستىرىلعان XVIII جازعى ازييا ويىندارىندا قازاق بوكسشىلارىنا التىن بۇيىرمادى. بۇيىرمادى دەپ ايتقانىمىز دۇرىس شىعار. سەبەبٸ بيىلعى جارىستا اۋىر سالماقتاعى بوكسشىلار باق سىناعان جوق. تٶرەشٸلەردٸڭ دە بۇرا تارتقان تۇستارى بولدى.
قازاقستاندىق سپورتشىلار جازعى ازييا ويىندارىنا 1994 جىلدان بەرٸ قاتىسىپ كەلەدٸ. سودان بەرگٸ ارالىقتا بوكسشىلارىمىز سارى قۇرلىقتىڭ باستى دوداسىنان جەڭٸمپاز اتانباي قايتقان سەتتەرٸ بولماعان. اتاپ ايتار بولساق, ەلٸمٸز العاش قاتىسقان حيروسيماداعى جارىستا نۇرجان سمانوۆ (67 كگ) پەن قاناتبەك شاعاتاەۆ (71 كگ) جەڭٸستٸڭ ەڭ بيٸك تۇعىرىنان كٶرٸندٸ. اراعا 4 جىل سالا بانگكوكتا ٶتكەن ازييا ويىندارىندا قازاق بوكسشىلارى 3 التىن مەدال ەنشٸلەدٸ. ەرماحان يبرايموۆ (71 كگ), ۆياچەسلاۆ بۋربا (75 كگ) مەن مۇحتارحان دٸلدەبەكوۆ (+91 كگ) توپ جاردى.
2002 جىلعى ازييا ويىندارى پۋساندا ٶتتٸ. بۇل جارىستا نۇرجان كەرٸمجانوۆ (64 كگ) پەن گەنناديي گولوۆكين (71 كگ) التىننان القا تاقتى. 2006 جىلى دوحادا بٸر بوكسشىمىز عانا جەڭٸمپاز اتاندى. ول – باقىت سەرسەكباەۆ (69 كگ) ەدٸ.
گۋانچجوۋدا (2010 جىل) قازاق بوكسشىلارى ەكٸ التىن الدى. بٸرٸن – سەرٸك سەپيەۆ (69 كگ), ەكٸنشٸسٸن دانييار ەلەۋسٸنوۆ (64 كگ) ەنشٸلەدٸ.
2014 جىلى ينچحوندا ٶتكەن ازييا ويىندارى قازاق بوكسشىلارى ٷشٸن اسا تابىستى بولدى. 6 بٸردەي بىلعارى قولعاپ شەبەرٸمٸز ازۋىن ايعا بٸلەدٸ. دانييار ەلەۋسٸنوۆ (69 كگ) ازييا ويىندارىندا ەكٸ رەت قاتارىنان توپ جارعان العاشقى بوكسشى اتاندى. ٸليياس سٷلەيمەنوۆ (52 كگ), جەنٸبەك ەلٸمحانۇلى (75 كگ), ەدٸلبەك نييازىمبەتوۆ (81 كگ), انتون پينچۋك (91 كگ) پەن يۆان دىچكو (+91 كگ) جەڭٸمپاز اتانىپ, قازاق ەلٸنٸڭ ابىرويىن اسىردى. بوكسشىلارىمىز بۇرىن-سوڭدى بولماعان بيٸك بەلەستٸ باعىندىردى.
بيىلعى ازييا ويىندارىندا بوكسشىلارىمىزدىڭ جولى بولمادى. سونداي-اق اۋىر سالماق دەرەجەسٸ الىنىپ تاستالدى. بۇل دا جٷلدە الاتىن جولىمىزدى بٶگەدٸ. ەكٸ بوكسشىمىز عانا فينالعا شىقتى.
75 كگ-عا دەيٸنگٸ سالماقتا ەبٸلحان امانقۇل ازييا ويىندارىنىڭ جەڭٸمپازى اتانا المادى. اشىلۋ سالتاناتىندا قازاقستاننىڭ تۋىن كٶتەرٸپ شىققان بوكسشى فينالدا ٶزبەك بوكسشىسى يسرايل مادريموۆقا جول بەردٸ. تٶرەشٸلەر 3:2 (27:28, 27:28, 28:27, 29:26, 28:27) ەسەبٸمەن قارسىلاسىن جەڭٸمپاز دەپ تانىدى. ازييا ويىندارىنا العاش قاتىسقان ەبٸلحاننىڭ جٷلدەسٸ التىن بولمادى, كٷمٸس بولدى.
قازاقتىڭ سالماعى اتانىپ كەتكەن 69 كگ-عى التىندى دا ٶزبەكتەر "ٶڭگەرٸپ" كەتتٸ. ٶكٸنٸشتٸ-اق... تٶرەشٸلەر 3:1 ەسەبٸمەن ٶزبەك بوكسشىسى بابا ۋسمون باتۋروۆقا جەڭٸستٸ سىيلادى. ازييا ويىندارىندا 2006 جىلدان بەرٸ بۇل سالماقتا قازاق بوكسشىلارى اتوي سالىپ كەلگەن ەدٸ. امال قانشا?... كەلەسٸ ازييا ويىندارى ورالعانشا...
ازييا ويىندارىنداعى بوكس بەسەكەسٸ سوڭىنان ۇلتتىق قۇرامانىڭ باس جاتتىقتىرۋشىسى مىرزاعالي ايتجانوۆ ەدٸلەتسٸزدٸك كٶپ بولعانىن ايتىپ, اعىنان جارىلدى. بۇل تۋرالى قر ۇوك رەسمي سايتىنا بەرگەن سۇحباتىندا ايتا كەتتٸ.
- ازييا ويىندارىنا بەس جٷلدە الامىز دەپ كەلگەنبٸز. وعان شامامىز دا جەتەتٸن ەدٸ. الايدا, تىم تٶمەن نەتيجە كٶرسەتٸپ وتىرمىز. ەر ەل ٶز سپورتشىسىن قورعايدى. سول سەبەپتٸ, بٸر ەلدٸڭ سوڭىنا تٷسٸپ العانىمىز دۇرىس بولماس. جٸگٸتتەر بار كٷشٸن سالدى, ولارعا ايتارىم جوق. كٶپتەگەن كەدەرگٸلەر مەن كەلەڭسٸز جايتتار ورىن الىپ وتىر. فينالعا دەيٸن ٷش بوكسشىمىزدىڭ جولىن كەسكەن. ەندٸ, مٸنە, ەكٸ جٸگٸتٸمٸزدٸڭ التىنىن تارتىپ الدى. سابىر قىلعاننان باسقا امال جوق.
جالپى, بٸزگە شارشى الاڭداعى قارسىلاستارمەن عانا ەمەس, باسقالارمەن دە كٷرەسۋگە تۋرا كەلدٸ. قايرات ەرەليەۆتٸ الىپ تاستاعاننان كەيٸن-اق, قيىن سوعارىن سەزدٸم. تٸپتٸ, ازييا ويىندارىنا اتتانار كەزدە دە بۇل بەلگٸلٸ بولعان. سەبەبٸ, بٸزدٸڭ بٸر ٶكٸلٸمٸز جوق. قازاقستاندىق تٶرەشٸلەر دە الىنباعان. سوندىقتان ازييا ويىندارىندا ساياسات جەڭدٸ.
اسلانبەك شىمبەرگەنوۆكە جوق جەردەن ەسكەرتۋ بەرٸپ, ۇپايىن الىپ تاستادى. بوكسشىعا ٷش-تٶرت رەت اۋىزشا ەسكەرتۋ بەرٸلگەن سوڭ عانا, ۇپايىن الىپ تاستاۋشى ەدٸ. بۇل جولى بٸردەن...
جٸگٸتتەرگە ايتار ٶكپەم جوق. بار كٷشٸن سالدى, - دەدٸ مىرزاعالي ايتجانوۆ.
