2016 jyldyń jazy álemdik Boks tarihyna qaraly habarmen jazylary anyq. Ol - Muhammed Alidiń ómirden ótýi bolatyn… Biraq qazaq boksy úshin shildeniń jetisi jat elde, Kanadanyń Monreal qalasynda, “QAZAQ” atyn aspandatqan jemisti oiyndardyń biri emes, biregeii boldy.
Atlanttyń arǵy betindegi AQSh elinde Qazaqstannyń atyn jat eldilikterdiń jadysyna naizadai qadap júrgen batyrymyz Gena Golovkin bolsa, qaraǵandylyq jerlesimizdiń sol erligin búginde úieńki japyraqty (Kanada) elinde úsh birdei qazaq batyry jalǵastyra bildi, tipten ózderiniń ádemi jeńis joldaryn sala bildi. Jeńisti oiyndardyń jeline marqaiǵan Kanadadaǵy Qazaqstandyq qaýym tamsanyp qana qoimai, talǵamyn tańdaý qiynǵa soǵatyn kanadalyqtar da qazaq jigitteriniń jigerine kýá boldy.
Shildeniń altysy qazaqstandyq jurt Astana kúnin atap ótse, kelesi kúni Qazaqstan týy Kanadanyń boks tórinde úsh márte jelbiredi. Jigerdi qoldan bermes qazaq jigitteriniń jeńisinen artyq syilyq joq bolar El Ordasy úshin.
Qazaq halqynyń esim qoiý dástúri de keide adam taǵdyryn anyqtasa kerek. Olai deitinim, kanadalyq kásipqoi bokstaǵy Qazaqstannyń iz salýshysy Batyr Júkembaev - QR-nyń jastar arasyndaǵy, stýdentter arasyndaǵy jáne de Qazaqstan, Ýkraina men Finliandiiadaǵy týrnirlardyń chempiony. Kanadanyń kásipqoi boks ringindegi 4 oiyndy nokaýtpen jeńgen Batyr kanadalyqtar úshin “Qazaq Batyry” atanyp úlgerdi.
Batyrdai qazaq jigitteriniń jalǵyz emestigin dáleldegen kelesi boksshy Abylaihan Hýsainov jergilikti boksshyny nokaýtpen jeńip, qarsylasynyń jankúierlerin jerge qaratty. Alǵashqy oiynynan-aq jastyq jigeri men jeńiske qulshynysyn jasyrmaǵan Abylaihan Batyr salǵan jeńistiń sara jolyn abyroimen jalǵai bildi.
Batyr men Abylaihan kásipqoi bokstyń tizginen ózgelerge bermei júrse, olardyń áýesqoi bokstaǵy izbasary Rýstam Svaev ta alǵashqy oiynyn jeńispen aiaqtady. Oryn alǵan toǵyz oiynnyń úsheýinde boi kótergen qazaq jigitteriniń jeńisi jat elde júrip eldi ańsaǵan qazaqstandyqtardyń rýhyn órletti, Kók týdyń qyranyn Monrealda tórletti. Sporttyń siqyry da sol bolar, sanaýlylardyń jeńisi sansyz sanalyǵa mártebe men qýanysh. Frantsýz tildiler basym qala Monreal ol kúni fýtboldan Eýropa qurlyǵynyń kýbogynyń finalyna joldama alǵan Frantsiianyń jeńisi emes, úsh birdei qazaq jigitiniń jeńisine tamsandy.
Jat eldiń ringindegi qazaq áýeniniń sharyqtaýy patriottyq sezimdi oiatpai qoimaityny da anyq, Kvebekte ekenińdi umyttyryp, qazaqtyń keń dalasyn kózge elesteter qymbat sezim úshin de búgingi kanadalyq kásipqoi bokstyń juldyzdaryna alǵys sheksiz. Qazaq poeziiasynda aitylatyn “Rýhy – ór, Táni – bekem, Bul bir qaisar halyq eken…” deitin oidyń jeteginde ketken kanadalyqtardyń Qazaqstan jaily saýattaryn tarih pen geografiia emes, kásipqoi boksshylar ashýda.
Bálkim Ábdijámil Nurpeiisov osy ǵasyrǵa tiesili jazýshy bolǵanda, “Qan men ter” romanynyń basty keiipkeri dál osy ÚSh chempionymyz bolar ma edi, kim bilsin?!
Úsh jigittiń jeńisteriniń qupiiasy nede? Baq pen bap birge shabýy tiis sport salasynda oiynshylardyń qadamyn boljai bilip, darynan tani biliten óz isiniń sheberleriniń orny asa mańyzdy. Batyr, Abylaihan men Rýstamnyń qaisarlyqtaryn jat elde qairap júrgen menedjer Anna Revva esimdi arý Qazaqstan qoǵamyna tanys emes. Sahna ónerinde de shymylǵynyń arǵy betindegi keiipkerlerdi kópshilik bile bermeitini siiaqty Anna da eńbeginiń jemisin tek jeńis retinde qabyldaýǵa daǵdylanǵan azamatsha. Monrealdyq biznes-hanym sport álemine kelgenine úsh jyl bolsa da, óziniń qyraǵy kózdi maman ekenin dálildei bildi. Óz kásibi jolyn Artýr Beterbievpen bastaǵan Anna qazaq jigitteriniń jattyqtyrýshysy Stefan Larýshtyń joǵary pikirin ielenip úlgerdi.
Jeńisti ózderiniń ekinshi esimderi etýdi kózdeitin jerlesterimizdiń jeńisine esh kúmánimiz joq. Tilerimiz: kásibi bokstyń násibine ie bolyp, Qazaqstan atyn jat elde asqaqtata berińder!!! Qazaqstan men Kanada arasynda muhit bolsa da, senderge degen senim men úmit tolaǵai!!!
Qusaiynqyzy Aigerim
Shilde, 2016
Monrel, Kanada
Ult portaly
