Aiaqsyz týǵan qazaqstandyq Áli Turǵanbekov álemdik fýtbol juldyzy Krishtianý Ronaldýmen kezdesti, dep habarlaidy "Ult aqparat".
Áli men Ronaldý dop oinap, birge fotoǵa tústi. Video men fotony UFC chempiony Habib Nýrmagomedov óziniń Instagram paraqshasynda jariialady.
«Mine, sondyqtan da sen álemdegi úzdiksiń... Kóp rahmet, Krishtianý. Sen meniń baýyrymdy baqytty ettiń», - dep jazdy Habib.
Balanyń Instagram paraqshasynan tolyq videony kórýge bolady. Onda Ronaldý Alige arnap dopqa jazý jazyp bergeni, sondai-aq Álidiń portýgaldyqqa qazaqstandyq shokoladty syiǵa berip turǵan fotosy bar.
Aita keteiik, jaqynda ǵana Habib Nýrmagomedov pen Álidiń kezdesýi Almatyda ótti. Sol kezde balaqai oǵan PSG oiynshylarynyń qoltańbalary bar dop syilaǵan bolatyn.
Buǵan deiin qazaqstandyq bala fýtboldyń ańyz oiynshylary - braziliialyq Kafý, Hýlio Sezar, Bebetomen, sondai-aq ispandyq Havimen kezdesti.
Olardyń qatarynda Messi, Andrei Shevchenko, Neimar, Killian Mbappe, Edinson Kavani, Diego Maradona, Liverpýl oiynshylary Mohammed Salah, Roberto Firmino, Liverpýldiń bas jattyqtyrýshysy Iýrgen Klopp bar. Sondai-aq, óziniń kýmiri Nik Výichichpen de kezdesip úlgerdi. Ol sonymen qatar Liverpýl oiynshylaryna ÝEFA Sýperkýbogyn tapsyrdy.
