Qazaq-arab birlesken energetikalyq holdingi qurylady. Holding qurylymy jaiynda «Samuryq-Qazyna» AQ Basqarma múshesi, investitsiialar, jekeshelendirý jáne halyqaralyq yntymaqtastyq jónindegi Basqarýshy direktor Ernar Janádil aityp berdi, dep habarlaidy QazAqparat.
Ortalyq kommýnikatsiialar qyzmetindegi baspasóz máslihaty barysynda BAQ ókilderi Arab ámirlikterimen birge qurylatyn Energetikalyq holdingtiń qurylymy qandai bolatyndyǵyn suraǵan edi.
«Energetikalyq holdingti «Astana» halyqaralyq qarjy ortalyǵynyń negizinde qurýdy kózdep otyrmyz. Bul qurylymnyń aiasynda eki sýbholding paida bolady. Onyń biri qazir qoldanystaǵy elektr-energetika nysandaryn jańartý jobalaryna investitsiia quiady. Al ekinshisi jańartylatyn energiia kózderi salasyndaǵy jańa jobalardy júzege asyrýǵa qatysty is-sharalarmen ainalysady. Energetikalyq holdingti arnaýly komitet basqarady. Onyń quramyna qazaqstandyq jáne arab kompaniiaiialary men qorlarynyń ókilderi kiredi ári basqarýmen ainalysady», - dedi Ernar Janádil.
