Foto: ashyq derekkóz
Kórnekti jazýshy, satirik, Qazaqstannyń qurmetti jýrnalisi, Halyqaralyq «Alash» syilyǵynyń laýreaty Ǵabbas Qabyshuly 90 jasqa toldy, dep habarlaidy Ult.kz.
Mereitoi iesiniń shańyraǵyna, Qazaqstan Jazýshylar odaǵy Basqarmasynyń Tóraǵasy Mereke Qulkenov pen Almaty qalasy Mádeniet basqarmasynyń basshysy Ǵani Mailybaev arnaiy bardy. Ǵani Mailybaev Memleket basshysy Qasym-Jomart Toqaevtyń júrekjardy lebizge toly quttyqtaý hatyn oqyp berdi. Sonymen qatar Memlekettik keńesshi Erlan Qarinniń quttyqtaý haty men Almaty qalasynyń ákimi Erbolat Dosaevtyń da quttyqtaýy tabystaldy.
Qazaq qalamgerleri atynan sóz sóilegen Qazaqstan Jazýshylar odaǵy Basqarmasynyń Tóraǵasy Mereke Qulkenov Ǵabbas Qabyshulyna qurmet kórsetip, qalamgerdiń ádebiet pen jýrnalistikadaǵy, satira men aýdarmadaǵy eren eńbegin atap ótti. Ol jazýshy shyǵarmashylyǵynyń qoǵamdy tereńnen tolǵap, ázilmen astarly oi aitatyn daralyǵyna erekshe toqtaldy.
Quttyqtaýynda Mereke Qulkenov:
«Sizdiń qalamyńyzdan týǵan árbir shyǵarma – qoǵamnyń tereń tamyryn dóp basyp, kúlki arqyly oi salatyn ótkir týyndylar. “Mysyqta saqal nege joq?”, “Jetim jinalys”, “Tarihta qalǵyń kele me?” syndy satiralyq áńgimelerińiz qazaq ádebietiniń altyn qorynan oiyp turyp oryn alady», – dep atap ótti.
Sondai-aq ol jazýshynyń A.Chehov, S.Mihalkov, B.Nýshich sekildi álem ádebieti klassikteriniń týyndylaryn qazaq tiline tárjimalaýdaǵy eńbegin joǵary baǵalady. Bul aýdarmalar qazaq oqyrmanyna álem ádebietiniń úzdik úlgilerin usynýmen qatar, tól ádebiettiń kókjiegin keńeitkeni aityldy.
«Sizdiń shyǵarmashylyǵyńyz – kúlki men shyndyqtyń arasyndaǵy kópir. Ádebiet arqyly eldiń sanasyn jańǵyrtyp, urpaq tárbiesine zor úles qostyńyz. 90 jyldyq mereitoiyńyzben shyn júrekten quttyqtai otyryp, Sizge zor densaýlyq, shyǵarmashylyq uzaq ǵumyr tileimin», – dep túiindedi Jazýshylar odaǵynyń tóraǵasy.
