Qaza bolǵan astanalyq órt sóndirýshi Asqar Zabikýlinniń esimi qandai kóshege beriletini belgili boldy, dep habarlaidy QazAqparat.

Qala ákimdiginiń resmi saitynda málim etilgendei, búgin Astana onomastika komissiiasynyń otyrysy ótti. Onyń barysynda adamdardy qutqaryp, erlikpen qaza tapqan Asqar Zabikýlinniń esimin Esil aýdanynda («Úrker» turǵyn alaby) ornalasqan E-583 kóshesine berý týraly sheshim qabyldandy. Osy Esil aýdanynda órt sóndirýshi Saiat Abeev pen granatany keýdesimen jaýyp, terroristi zalalsyzdandyrǵan politsiia kapitany Ǵaziz Baitasovtyń esimimen atalǵan kósheler bar ekenin aita keteiik.

Sondai-aq onomastika komissiiasy Asqar Zabikýlin qyzmet etken №6 Mamandandyrylǵan órt sóndirý bólimine onyń esimin berip, mekeme aldyna biýst ornatýdy usyndy. Budan bólek, órt sóndirýshiniń estelik sýretin Astana qalasynyń A.Pýshkin kóshesinde ornalasqan «Qutqarýshylar saiabaǵyndaǵy» aqparat taqtasyna ornalastyrý sheshimi qabyldandy. Bul saiabaqta qaitys bolǵan qutqarýshylardy eske alýǵa arnalǵan aqparat taqtasy ornalastyrylǵan.

Qalanyń onomastika komissiiasynyń otyrysynda qaralǵan usynystar endi Astana máslihatynyń turaqty komissiialarynyń jariia tyńdaýyna, Astana qoǵamdyq keńesiniń qaraýyna jiberiledi.

Buǵan deiin qutqarýshy Asqar Zabikýlinniń otbasyna Memleket basshysynyń tapsyrmasy boiynsha úsh bólmeli páterdiń kilti tabystalǵan bolatyn. Páter Asqardyń jubaiyna jeke menshikke berildi. Ákimdik málimetinshe, qazirgi ýaqytta páterde árleý jáne odan ári jihazben tolyqtyrý jumystary júrgizilip jatyr.

Qutqarýshy Aian Kempirovtiń otbasyna ipotekany óteýge kómek kórsetildi. Onyń somasy 24 million teńgeni quraidy. Sonymen qatar Asqar Zabikýlin men Aian Kempirovtiń otbasylarynyń 6 million teńge somasyndaǵy nesieleri óteldi.