Foto: Qaisar fýtbol klýby
Qyzylordalyq «Qaisar» komandasy biyl sheteldik fýtbolshylardan bas tartty. Endi olar tek qazaqstandyq fýtbolshylarǵa senim artady, dep habarlaidy Kazinform HAA.
Bul jóninde oblystyq Dene shynyqtyrý, sport jáne týrizm basqarmasynyń basshysy Baqtiiar Artaev málim etti.
"Bul sheshimdi jergilikti turǵyndar ártúrli qabyldady. Elimizde jankúierler tarapynan qazaqstandyq oiynshylarǵa kóńil bólý qajettigi týraly jii aitylady. Dese de qazirge deiin naqty qadam jasalǵan joq. Nege biz el jastaryna úmit artpaimyz? Talanttarǵa nege jol ashpaimyz? Jańadan jasaqtalǵan komanda alǵashqyda qarsylasyna qaýqar kórsete almaýy múmkin. Alaida árbir oiynda olar tájiribesin arttyrady, sheberligin jetildiredi. Olardyń arasynan myqty fýtbolshylar shyǵady degen oidamyn. Qazir komandanyń 700 mln teńgege jýyq qaryzy bar. «Qaisardyń» basshylyǵyna kelgen azamattar odan qutylýdyń jolyn qarastyryp jatyr. Ol demeýshilerden túsken qarjy esebinen jabylady", – dedi basqarma basshysy.
Qazir qyzylordalyq klýb Túrkiia jerinde oqý-jattyǵý jiynyn ótkizýde.
«Qaisar» fýtbol klýbynyń direktory Talǵat Ábdiǵapparuly qazir demeýshilermen kelisimshartqa qol qoiylǵanyn atap ótti. Sondai-aq komandaǵa aqsha túsirý maqsatynda qosymsha qarjy kózderi qarastyrylyp otyr.
Qazir oblys ortalyǵynda boi kóterip jatqan 11 myń jankúierge arnalǵan jańa stadion biyl mamyr aiynda paidalanýǵa berilmek. Ol ÝEFA-nyń úshinshi kategoriia talabyna sai keledi. Bul talap boiynsha komanda eýrokýboktyń toptyq kezeńindegi oiyndaryn da óz stadionynda ótkizýine múmkindigi bar.
