Muhamedjan baýyrymnyń aqtalyp jazǵan jazbasyn oqydym. Meni qate aqparatqa aldanýdyń nátijesinde emotsiiamen ózine qarsy pikir jazypty degen syńaida áńgime aitypty.
Oý, Muhamedjan baýyrym, sózderińe qarsy shyǵyp, saǵan renjigen men ǵana emes, búkil halyq ekenin jaqsy bilesiń. Bul - ekeýmizdiń aramyzdaǵy jeke bastyń daýy emes. Montajdalǵan depsiń. Neniń montaj, neniń shantaj ekenin ajyrata alatyndai jastamyn dep oilaimyn. Kez kelgen uzaq video qysqartylady. Eger qysqartqanda maǵyna ózgerip ketse, onda ózińmen tolyq kelisemin. Tipti ózińdi qorǵaimyn. Biraq ne aitqyń kelgeni ap-anyq tur ǵoi. "Mekkede namaz oqyǵan adamdy jambasynan ońdyrmai tebýge ruqsat berip qoiǵan din qandai din" - degen kúdikti saýal árkimniń oiynda qaldy. Qasietti qaǵba aldynda keibir adamdardyń Allaǵa berilip ketip qolaisyz jerge namaz oqyǵanyn sheshýdiń quiymshaqqa qatty tebýden basqa órkenietti, adam qadirin ketirmeitin basqa mádenietti joly joq pa, sonda? Mine osy sózdermen dinniń qadirin ketirdiń, saiasatqa qoljaýlyq ettiń. Jáne bul sózińdi, iaǵni, dini argýmentti kóshege shyqqan halyqty jasyna qaramai aiamai qamaýǵa, politsiiany qairaý úshin aitqanyńnyń qai jeri montaj? Sosyn kóshege bireý aldanyp shyǵady, endi bireý taryǵyp shyǵady. Qaisibiri ádilettik izdep, azamattyq pozitsiiasyn bildirý úshin shyǵady. Politsiiaǵa "alańdaǵy halyq bireýińniń ákeń, bireýińniń anań, ápke-qaryndasyń. Memlekettiń qaýipsizdigin dórekilikke barmastan saqtańyzdar. Ásirese jasy úlken kisilerge qatty ketip jaǵdaidy odan ári ýshyqtyryp, halyqty ashyndyryp almańyzdar" - deseńiz naǵyz janashyrlyq, shynaiy memleketshildik bolar edi. Talai postymda da ashyq aityp júrmin. Men revoliýtsiiany qoldamaimyn. Biraq ádiletsizdikti aitýǵa, jetkizýge tiispiz. Ádiletsizdikti aitýǵa tiis adamdar tek saraidy madaqtaǵannyń nátijesinde memleketmizde kóptegen bylyqtar oryn alyp jatyr. Halyq ózińnen tarazynyń basyn teń ustap memleketimizdegi talan-tarajdy, jemqorlyqty, ysyrapshyldyqty, ádiletsizdikti de aitýyńdy qalaidy. Birjaqty ýaǵyzǵa halyq mezi bolǵan.
Sosyn ózińe ǵana ońasha aitatyn ekeýmizdiń aramyzdaǵy jeke bastyń máselesi emes qoi. Videoń barlyq áleýmettik jelide keń tarap, halyq mensiz de qyzý talqylyp jatqan bolatyn. Men din adamy retinde óz pozitsiiamdy bildirdim, qate sózderińdi synadym.
"Montaj" - dep aqtalmai-aq, "keibir sózderim men mysaldarym orynsyz bolypty, emotsiiamen aitylǵan qate ári artyq sózder eken. Sol úshin halyqtan keshirim suraimyn" - deseń, halyq basqasha qabyldar edi. Árdaiym halyqtyń janynda bolýǵa tiis óziń siiaqty aqynǵa osy jarasar edi. "Asyl arnany" jabýǵa qatysty pikirlerge qosylmaimyn. Ony qadaǵalap otyrǵan memleket pen QMDB mamandary bar.
Men óz oiymdy aittym, óziń de oǵan jaýap berdiń. Endi osy jerden toqtaiyq. Halyq aq-qarasyn ózi ajyratady. Artyq ketken jerim bolsa, keshirim suraimyn.
Qairat Joldybaiulynyń feisbýktaǵy jazbasynan
