Foto: © Sputnik / Bolat Shaihinov
Qairat Satybaldyuly isi boiynsha 14 million AQSh dollary memleket kirisine qaitaryldy, - dep habarlaidy "Ult aqparat" Antikor baspasóz qyzmetine silteme jasap.
"Qazaqstan Respýblikasynyń Sybailas jemqorlyqqa qarsy is-qimyl agenttigi Qairat Satybaldyulyna jáne basqa da adamdarǵa qatysty júrgizilip jatqan tergep-tekserý aiasynda elden zańsyz shyǵarylǵan aktivterdi, onyń ishinde qylmystyq jolmen alynǵan aqsha qarajatyn jáne ózge de múlikti qaitarý jóninde sharalar qabyldap jatyr.
Mamyrdyń sońyna qarai Sybailas jemqorlyqqa qarsy qyzmet shet memleketterdiń quqyq qorǵaý organdarymen halyqaralyq yntymaqtastyqty qamtamasyz etetin Bas prokýratýramen birlesip, Birikken Arab Ámirlikterinen jalpy somasy 14 million AQSh dollaryn qaitardy. Atalǵan qarajat memleket kirisine ainaldyrylyp, áleýmettik maqsattarda paidalanylady", - delingen habarlamada.
Antikor málimetinshe, qylmystyq qýdalaý bastalǵannan beri memleketke zańsyz satyp alynǵan Satybaldyuly jáne onymen bailanysty tulǵalardyń 464 milliard teńgeden asa somaǵa múliktik aktivteri men aqshalai qarajattary qaitarylǵan.
"Olarǵa ákimshilik ǵimarattar, ekskliýzivti zergerlik buiymdar, sándi kólikter, qolma-qol aqsha, aktsiialar men kompaniialardyń úlesteri, sondai-aq temirjol kiredi. Zańsyz shyǵarylǵan aktivterdi qaitarý boiynsha jumys jalǵasyp jatyr", - delingen habarlamada.
