Búgin fýtboldan Qazaqstan kýbogy toptyq kezeńi ekinshi týrynda Almatynyń «Qairaty» óz alańynda aqtaýlyq «Kaspiiden» jeńilip qaldy, dep habarlaidy "Ult aqparat".
Kezdesý barysynda «Qairat» jasyl alańǵa negizinen jastardy shyǵardy. Al «Kaspii» tájiribeli oiynshylaryna senim artty. Aqtaýlyq klýbtan 39-minýtta Nikola Tsýtskich esep ashty. Ekinshi kezeńniń 54-minýtynda Aleksei Zeleskii esepti ústemelei tústi. Nátijesinde «Kaspii» syrt alańda qarsylasynan 2:0 esebimen basym tústi.
Birinshi topta oiyn kórsetetin Túrkistan oblysynyń «Maqtaraly» óz alańynda «Tarazǵa» 1:2 esebimen jeńildi. Kezdesýde alań ielerinen Edige Oralbai 16-minýtta esep ashqan bolatyn. Degenmen maqtaraldyq Marlen Aimanov 28-minýtta avtogol avtory atanyp, tarazy basy teńesti. Al 41-minýtta tarazdyq Ýrosh Nenadovich mergendik tanytyp, kezdesý núktesin qoidy.
Oralda jergilikti «Aqjaiyq» óz alańynda Qyzylordanyń «Kaisaryn» qabyldaǵan bolatyn. Eki komanda 0:0 esebine qanaǵat bildirdi.
Eske salsaq, 16 shildede «Astana» «Aqtóbeni», «Shahter» «Qyzyljardy» 3:2 esebimen jeńse, «Tobyl» «Atyraýdy» 2:0 esebimen tize búktirdi.
Endi 18 shildede №8 BJMORSM (Nur-Sultan) men «Ordabasy» (Shymkent), «Turan» (Túrkistan) men «Jetisý» (Taldyqorǵan) ekinshi týrdy túiindeidi.
Aita ketsek, biyl atalǵan doda jańa talaptar boiynsha oinalady.
Toptyq kezeńde Premer-liganyń 14 komandasy men irikteý kezeńinen irkilmei ótken birinshi liganyń eki klýby tórt topqa bólingen.
