Qazaqstannyń Avstriiadaǵy Tótenshe jáne Ókiletti Elshisi taǵaiyndaldy, dep habarlaidy "Ult aqparat".
«Qairat Ermekuly Omarov Qazaqstan Respýblikasynyń Avstriia Respýblikasyndaǵy Tótenshe jáne Ókiletti Elshisi, Qazaqstan Respýblikasynyń Vena qalasyndaǵy halyqaralyq uiymdar janyndaǵy Turaqty ókili qyzmetine taǵaiyndaldy. Ol Qazaqstan Respýblikasynyń Birikken Ulttar Uiymy janyndaǵy Turaqty ókili qyzmetinen bosatyldy», - delingen Aqorda aqparatynda.
Qairat Ermekuly Omarov 1963 jylǵy 12 qańtarda Fergana qalasynda týǵan (Ózbekstan). 1985 jyly Almaty pedagogikalyq shet tilder institýtyn aǵylshyn jáne frantsýz tilderin muǵalimi mamandyǵy boiynsha bitirdi.
Eńbek jolyn 1987 jyly Almaty pedagogikalyq shet tilder institýtynda oqytýshy retinde bastaǵan. Qazaqstan Ǵylym akademiiasy Tarih, etnografiia jáne arheologiia institýtynyń ǵylymi qyzmetkeri, QR Jazýshylar odaǵy janyndaǵy kórkem aýdarma jónindegi bas redkollegiianyń aǵylshyn tilinen aýdarmalarynyń bas redaktory bolǵan.
Diplomatiialyq qyzmetin 1992 jyly QR SIM Pasport-viza bóliminiń ekinshi hatshysy qyzmetinen bastady. Sodan keiin Eýropa jáne Amerika elderi basqarmasynyń birinshi hatshysy, sondai-aq Amerika basqarmasy Eýropa jáne Amerika bóliminiń meńgerýshisi boldy. 1994 jyly Qazaqstannyń AQSh-taǵy Elshiligine birinshi hatshy retinde jiberilip, onda keńesshige deiin kóterildi.
1996-1998 jyldary Basqarma basshysy, keiin Eýropa departamenti direktorynyń orynbasary boldy. 1998-2003 jyldary Qazaqstannyń AQSh-taǵy elshiligine keńesshi-ýákil retinde qaita jiberildi. 2004 jyly QR SIM Erekshe tapsyrmalar jónindegi elshisi qyzmetin atqarǵan. 2004 jylǵy sáýir-tamyz aralyǵynda Prezident Ákimshiligi Syrtqy saiasat ortalyǵynyń bas inspektory boldy.
2004-2009 jyldary Qazaqstannyń Úndistandaǵy jáne Shri-Lankadaǵy qosa atqarýshy Elshisi boldy. 2009-2013 jyldary Syrtqy ister ministriniń orynbasary qyzmetin atqarǵan. 2013 jyldan 2017 jylǵa deiin - Qazaqstannyń AQSh-taǵy Elshisi.
Qazaqstannyń Aýstriiadaǵy Elshisi bolyp taǵaiyndalǵanǵa deiin 2017 jyldan bastap Qazaqstannyń BUU janyndaǵy Turaqty ókili retinde jumys istedi.
Tótenshe jáne Ókiletti Elshi diplomatiialyq dárejesine ie. Aǵylshyn jáne frantsýz tilderin meńgergen.
