Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq soty ánshi Qairat Nurtastyń isine qatysty sot sheshimin shyǵardy. Óner iesine 15 táýlikke qamaýǵa alý jazasy taǵaiyndaldy, dep habarlaidy "Ult aqparat".
Istiń mán-jaiynan belgili bolǵandai, Qairat Nurtas ushaq bortynda sózge kelip qalyp, janjal kezinde Asylbek Bekqaiyrovtyń densaýlyǵyna qasaqana jeńil ziian keltirgen. Budan bólek, tóbeles kezinde ol ádepsiz sózder aitqan. Ol óz áreketimen qoǵamdy syilamaýshylyq tanytyp, qoǵamdyq tártipti buzǵan.
Bul ÁQBtK-niń 73-1-babynyń 1-bóliginiń sanktsiiasy 15 AEK mólsherinde aiyppul salý nemese 15 táýlikke deiin ákimshilik qamaqqa alý túrindegi jaýapkershilikti; 434-baptyń 2-bóliginiń sanktsiiasy 15-ten 30 táýlikke deiingi merzimge ákimshilik qamaqqa alý túrindegi jaýapkershilikti kózdeidi.
Sottyń qaýlysymen ánshi ÁQBtK-niń 434-babynyń 2-bóligimen jáne 73-1-babynyń 1-bóligimen kózdelgen ákimshilik quqyq buzýshylyqty jasaǵany úshin kináli dep tanyldy:
- ÁQBtK-niń 73-1-babynyń 1-bóligimen taraptardyń tatýlasýyna bailanysty is qysqartyldy;
- 434-baptyń 2-bóligi boiynsha quqyq buzýshylyq ákimshilik jaza qoldanylǵannan keiin bir jyl ishinde qaitadan jasalǵandyqtan, 15 táýlik merzimge ákimshilik qamaýǵa alyndy.
Qaýly zańdy kúshine engen joq.
Esterińizge sala keteiik, búgin Qairat Nurtastyń ushaqta tóbeleskeni týraly habar tarady.
Aita ketý kerek, Qairat Nurtas MAÁS-nyń 2024 jylǵy 27 sáýir qaýlysymen bylapyt sóz aitqany úshin ákimshilik jaýapkershilikke tartylyp, oǵan 20 AEK (73 840 teńge) kóleminde ákimshilik aiyppul salynǵan bolatyn.
