Ánshi Qairat Nurtas Astana men Almaty qalalarynda Naýryz merekesi qarsańynda otbasylyq kontsert qoidy. Qairattyń ata-anasy, áieli jáne tórt balasy da sahnaǵa shyǵyp óner kórsetti. Qairat Nurtas óziniń Instagram paraqshasynda kontsertke kelgen qaýymǵa alǵys bildirip, kópten beri bala-shaǵasyn xalyqqa tanystyrýdy armandaǵanyn jetkizdi, dep habarlaidy Baq.kz tilshisi.
Aita keteiik, Qairat Nurtastyń jeke ómiri jáne otbasy jaily málimetter on jyldan astam ýaqyt boiy qupiia bolyp kelgen edi. Kópshilik onyń otbasy, balalary týraly habardar bolǵanymen, bul týraly resmi túrde aitylmai kelgen.
«Kópten beri bala-shaǵamdy xalyqqa tanystyrý armanym edi. Meniń de áke bolyp balalarymmen maqtanǵym keledi. 10 jyl boiy otbasymdy jasyrý maǵan ońai tigen joq. Qanshama aýyr sózder estip, negizsiz kiná taǵyldy. Osynyń barlyǵyna núkte qoiylǵanyna rizamyn. Keshimizdiń joǵary deńgeide ótýine atsalysqan rejisser-postanovshik, meniń direktorym Mira Kelimbetovaǵa (...) úlken rizashylyǵymdy bildiremin!», - dedi Qairat Nurtas.
Al, buǵan deiin de kontsertterde jii án salyp, óner kórsetip júrgen ánshiniń ákesi Nurtas Aidarbekov ár nárseniń óz ýaqyty bar dep aitqan bolatyn.
«Qudai qalasa nemerelerimniń shyǵatyn ýaqyty keldi. Ómirimniń jalǵasy, Qudaidyń bere salǵandaryn xalyq uzaq kútken siiaqty. Ár nárseniń óz ýaqyty bar. Altyndarym til-kózden aman bolyp, kontsertti abyroimen ótkizsek bolǵany», - dedi Nurtas Aidarbekov.
Ánshiniń anasy ári prodiýseri Gúlzira Aidarbekova kelini Juldyz Ábdýkárimovany 2017 jyly qazanda ótken «Arman...» atty filmniń tanystyrylymynda ǵana el aldyna alyp shyǵyp tanystyrdy.
Al, Juldyz Ábdýkárimova bolashaq joldasymen qalai tanysqanyn, osy ýaqytqa deiin qupiia ómir súrýge qalai shydap kelgenin jáne eki ul, eki qyzdarynyń bar ekenin málimdedi.
«Bizge jii qoiylatyn: "Qaida? Qalai tanystyńyzdar?" - degen suraqqa qysqasha jaýap berýge tyrysaiyn. 2004 jyl...Kúz... Jańa oqý jyly... RETsK... Qairat - vokal bólimende, al men - akter bólimende oqyp júrgen kezimiz. Bir-birimizdi syrttai bilip júrgenimen, arnaiy tanys bolǵan emespiz. Bir ai boiy kózben ǵana tanysyp, bir-birimizdi baqylap júrdik. Biraq, men ony kórgen saiyn, júregim eriksiz jylyp, júzim jainap, ishki jan dúniem ezile qalatyn. Alaida, sanam bul sezimderdi qabyldamaityn, minezim de sezimderge erik bermeitin, jigitti mensinbeitin, ózime de, ózgege de qatal Juldyz bolatynmyn. Týýý, ne deidi, Juldyz xanym,- ózin bir sulýýýmyn dei me?!. Sonda da, boijetkenniń jigitke sezimin birinshi esh ýaqytta bildirmeý kerek degen, qaǵida sanamda ábden sińip qalǵan. Qazan aiynyń shýaqty kúninde, asxanada, túski asymdy alyp turǵan kezimde, Qairatty joǵarǵy kýrstyń biri (ózderiniń sistemasy boiynsha), qasyqqa jumsaǵanyn qulaǵym shalyp qaldy. Sol stol basynda, ózimniń de toptastarymnyń otyrǵanyn baiqap, qasyqty Qairattan buryn, ózimniń taqtaishama qoiyp alyp, «Ózim aparyp beremin»- dedim de, bir jymiyp, janynan ótip kete bardym. Qairekeń turǵan boida, artymnan qarap, únsiz qala berdi... Sol eki arada, kózderimiz toǵysyp, ortamyzdan bir ushqyn ushyp ótken tárizdi... Quddy úndi kinodaǵydai boldy. Meni eń birinshi ret kórgen kezinde de, sol úndi aktrisalarynyń birine uqsatqanyn jasyrmady. Alǵashqy tanystyǵymyz osylai bastalyp edi... Eń tátti, taza ári alańsyz ómirimizdiń bastamasy dep bilemin. Jalpy, ekeýmizdiń stýdenttik kezimizdiń qyzyǵymen qatar shyjyǵy da kóp bolatyn», - dedi Juldyz Ábdýkárimova.
