Búgin QR Densaýlyq saqtaý ministri Eljan Birtanov elimizdiń belgili sportshylary, ánshileri jáne akterlerimen kezdesti. Júzdesý barysynda olarǵa «Densaýlyq elshisi» ataǵy berildi, dep habarlaidy QazAqparat tilshisi.
«Jaqynda Elbasy óz Joldaýynda búginde halyqty mazalap otyrǵan eń basty másele densaýlyq saqtaý salasy men meditsinalyq qyzmettiń sapasy ekendigin atap ótken bolatyn. Árine, bizdiń meditsina salamyzda másele kóp. Biraq, ár adam densaýlyǵynyń 50 paiyzy onyń salaýatty ómir súrýine tikelei bailanysty ekendigi ǵylymi turǵyda dáleldengen. Qazaqta «Aýyryp em izdegenshe, aýyrmaityn jol izde» degen sóz bar. Sondyqtan bizdiń ministrliktiń strategiiasynda aýrýlardyń aldyn alý airyqsha basymdyqqa ie baǵyt», - dedi ol kezdesý barysynda.
Sonymen qatar Eljan Birtanov sońǵy jyldary elimizde sportpen ainalysyp, durys tamaqtanýǵa den qoiǵan halyqtyń úlesi de artyp kele jatqanyn basa aitty.
«Osy oraida biz bul jumystarǵa esimi elge tanymal azamattardy da tartqymyz keledi. Halyq syilaityn, qurmetteitin sizdermen birge jumys isteý oiymyzda bar. Usynymyzdy qoldaǵandaryńyz úshin rizashylyǵymdy bildiremin. Densaýlyq elshileri - óner, sport, estrada áleminiń belgili tulǵalary óz qyzmetteri aiasynda salaýatty ómir saltyn qalyptastyrýǵa eleýil úles qosa alady», - dedi ministr.
Soynmen elimizdiń eń alǵashqy «Densaýlyq elshisi» ataǵy ánshi,Qazaqstannyń eńbek sińirgen qairatkeri Qaraqat Ábildinaǵa, akter Nurlan Álimjanovqa, ánshi Qairat Nurtasqa, ánshi, kásipqoi boksshy Ibragim Eskendirge berildi. «
Árbir pende deni saý urpaq tileidi. Ókinishke orai, qaragóz balalarymyzdyń arasynda aýyr naýqasqa, jazylmas dertke shaldyqqandary da bar. Bul degenińiz júktilik kezde oryn alǵan qatelikterdiń saldary degen sóz. Iaǵni, sábidi jaryq dúniege ákeler ananyń densaýlyǵynyń nasharlaýymen bailanysty. Jalpy, bolashaq ananyń aldyn ala daiyndyq júrgizbeýi, densaýlyǵyna enjar qaraýy nátijesinde kináraty bar balalar dúniege kelip jatyr. Bul dabyl qaǵatyn másele. Sondyqtan dúniege sábi ákelýdi armandap júrgen analar eń aldymen ózderiniń densaýlyǵyn kútkeni durys. Sonda bizde mundai problema bolmas edi», - dedi ministrmen kezdesýden keiin BAQ ókilderine suhbat bergen Qaraqat Ábildina.
