Pedofilderdi pishtirý emes, óltirý kerek! Kóringen jerde jasóspirimderdi jáýkemdep kete beretinderge ólim jazasyn qaitarýdy suraǵan jurtqa jaýap bergen Joǵary sot tóraǵasy jaqyn kúnderi ondai ózgeris bolyp qalýy múmkin dedi.
«Ólim jazasyn qaitarý máselesi tereń zertteýdi qajet etedi. Eger ólim jazasynan qoryqqannan osyndai ister azaiatyn bolsa, men árine ólim jazasyn qaitarýǵa keliser edim. Sondyqtan ony jan-jaqty zerttep, eger sondai qorytyndyǵa kelgen jaǵdaida ondai ózgeris oryn alady dep oilaimyn», - dedi QR Joǵarǵy sot tóraǵasy Qairat Mámi.
Moratoriidi alyp tastaý máselesi pedofildiń qolyna túsip, aqyl-esinen aiyrylǵan aqtaýlyq 6 jasar qyzdyń oqiǵasynan soń qaita-qaita kóterilip jatyr. Ondai jantúrshigerlik jaǵdai keshe ǵana Jezqazǵanda da qaitalana jazdady. Suraqtardy qarsha boratqan jurt Qairat Mámige qara qyldy aqshaǵa jaryp júrgen áriptesterine qatysty da shaǵymdandy. Tórelikti tiynǵa satyp, ózin tómen qaratqan sýdialardyń baryn moiyndaǵan Mámi ondailardy tike ózine aitýdy surady. Bas sýdia solarǵa ashýlanamyn dep, áriptesteriniń qateligin de aityp qaldy. Máselen, atyshýly «Álibi isin» qaraǵan qazy qatelesip, toqalǵa talasqan Qairat Jamalievtiń bar múlkin memleket esebine tartyp alypty. Keiin is qaita qaralyp, teń jartysy kásipkerdiń kelinshegine qaitarylǵan. Bir ózi júzdegen bidiń ústinen qaraǵan Qairat Mámi aima ai alatyn mańdai ter aqysyn da jasyrmai aityp berdi.
«Jalaqym meniń qupiia emes! 1 million 100 myń teńge jalaqy alamyn. Qolyma 900 myńnan artyq tiedi», - dedi Joǵarǵy sotynyń tóraǵasy.
