Qazaqstan Respýblikasynyń Konstitýtsiiasy kúnine arnalǵan «Konstitýtsiianyń tsifrlyq órkeniet dáýirinde memleket pen qoǵamnyń transformatsiialanýy jaǵdaiyndaǵy róli» taqyrybynda dóńgelek ústel ótti.
Dóńgelek ústelge Qazaqstannyń memlekettik qurylymdarynyń basshylary, Parlament depýtattary, quqyq qorǵaý mekemeleriniń ókilderi, sondai-aq belgili otandyq ǵalymdar qatysty.
Dóńgelek ústeldi júrgizgen Konstitýtsiialyq Keńestiń Tóraǵasy Qairat Mámi Ata zańnyń Qazaqstan halqy úshin biik maqsattarǵa qol jetkizýdiń alǵysharty ekenin aitty.
«Konstitýtsiia – egemendigimizdi áigileitin, azattyǵymyzdy aiqyndaityn mańyzdy qujat ári tatýlyqty tý etken eldigimizdiń altyn qazyǵy. Ata Zańdy qurmetteý, buljytpai oryndaý – alǵa qoiylǵan biik maqsattarǵa qol jetkizýdiń alǵysharty» - dedi ol.
Sonymen qatar, Qairat Mámi biyl qabyldanǵanyna 24 jyl tolyp otyrǵan Ata zańymyzdyń erekshelikterine toqtaldy.
«Qazaqstannyń Tuńǵysh Prezidenti – Elbasy N.Á.Nazarbaevtyń bastamasymen respýblikalyq referendýmda qabyldanǵan qoldanystaǵy Konstitýtsiia elimizdi demokratiialyq, zaiyrly, quqyqtyq jáne áleýmettik memleket retinde bekitýdiń quqyqtyq negizin qalady. «Bolmysyn quqyqpen aishyqtaǵan, ómirin tártippen órgizgen el azbaidy», degen dana sóz bar. Sondyqtan bul memlekettik merekeni belgileý – elimizdiń órkenietti quqyqtyq jolmen damitynynyń belgisi. Bul joldy tańdaǵan da, Ata Zańnyń mátininde qarastyrylǵan merekeni bekitken de biliktiń birden-bir bastaýy – Qazaqstan halqy» - dedi Konstitýtsiialyq Keńestiń Tóraǵasy.
Jiyn eki sektsiiadan turdy. Is-shara barysynda eldegi áleýmettik, quqyqtyq jáne demokratiialyq memlekettiń qaǵidattaryn bekitý baǵytynyń tereńdeýin eskere otyryp, Konstitýtsiianyń róli men áleýetin jan-jaqty talqylandy.
