Búgin Túrkistan oblysynyń qurylǵanyna bir jyl tolýyna orai uiymdastyrylǵan baspasóz máslihatynda aimaq basshysy Ómirzaq Shókeev kadr tańdaýda qandai kriteriilerge mán beretinin aityp ótti. Óńir basshysynyń aitýynsha, maman tańdaýda eń bastysy - kásibi biliktiligine mán berý qajet, dep habarlaidy "Ult aqparat".
«Bireýler men týraly «jaqyndaryn, jerlesterin jumysqa tartady» dep oilaidy. Shyndyǵynda ondai eshteńe joq. Ony tekserseńizder de bolady. Men qyzmet istegen jerlerde ózim taǵaiyndaityn adamdardyń tizimin alyp, saraptama jasasańyzdar da bolady, bári shyǵady. Negizi men qai jerde jumys istesem de, Qostanai, Astana, Shymkentte bolsyn, kásibi biliktiligi joǵary komanda jinap júremin. Sebebi, ákimderde sondai bilikti komanda bolýy kerek. Ár jerden, ár saladan», - dedi Ómirzaq Shókeev.
Aimaq basshysy sondai-aq, bir orynnan «qozǵalmai» otyratyn basshylar týraly pikir bildirdi. «Bir salany uzaq jyldar boiy basqarý jemqorlyqqa bir qadam jol emes pe?» degen saýalǵa ákim tiisti jaýabyn berdi.
«Meniń ustanymymda «adam jiyrma, otyz jyl otyr, sondyqtan alyp tastaiyq» degen printsip joq. Adam kásibi deńgeii joǵary maman bolsa, óz salasynda taza jumys istese, bekerden-beker qyzmetten alyp tastaýǵa bolmaidy. Qyzmet - adam ómiriniń nátijesi, abyroiy, jan-jaǵyndaǵy halyqtyń aldyndaǵy óziniń deńgeii. Sondyqtan tekten-tek, bostan-bos «jasy kelip qaldy» nemese «kóp otyrdy» dep jumystan alyp tastaý mende joq», - dedi Ómirzaq Shókeev.
