Batys Qazaqstan innovatsiialyq-tehnologiialyq ýniversitetin bitirgen maman eń joǵary jalaqy alady. Bul týraly búgin Ortalyq kommýnikatsiialar qyzmetindegi brifingte Bilim jáne ǵylym salasyndaǵy baqylaý komitetiniń tóraǵasy Talǵat Eshenqulov aitty, dep habarlaidy QazAqparat tilshisi.
Otandyq joǵary oqý oryndarynyń bilim berý baǵdarlamalaryna júrgizilgen reitingtiń ekinshi kezeńiniń nátijesin jariia etken onyń aitýynsha, reiting 4 kriteriige súienip jasalǵan. Olar - túlekterdiń jumysqa ornalasý paiyzy jáne olardyń ortasha eńbekaqysy, baǵdarlama ózektiligi baǵasy, sonymen qatar túlekterge júrgizilgen saýalnama nátijesi men jumysqa turý týraly derekter.
«Ózderińizge belgili, birinshi kezeńde 33 mamandyq boiynsha 784 bilim berý baǵdarlamasyna baǵalaý júrgizgen edik. Qazir sonyń ekinshisi júrgizildi. Búgingi tańda 31 mamandyq boiynsha 681 baǵdarlamany baǵalap shyqtyq. Eki kezeń ishinde JOO-ny bitirgen 6 myńǵa jýyq azamattan saýalnama aldyq», - dedi Talǵat Eshenqulov.
Onyń dereginshe, ýniversitetti aiaqtaǵan jyly jumysqa ornalasýdyń eń joǵary deńgeiin «Metallýrgiia» mamandyǵy kórsetken. Olardyń qatarynda Rýdnyi indýstriialyq institýty men O.Baiqońyrov atyndaǵy Jezqazǵan ýniversitetiniń túlekteri bar. Jumysqa ornalasýdyń 58%-yn «Sý resýrstary men sýdy paidalaný» mamandyǵynyń túlekteri kórsetip otyr.
«Reitingtiń ekinshi kezeńinde salalyq sarapshylardy qatystyra otyryp, bilim berý baǵdarlamalarynyń mazmunyndaǵy alshaqtyqty baǵalaý jáne taldaý jumystary júrgizildi», - dedi ol.
Komitet basshysynyń paiymynsha, JOO-lardyń negizgi qateligi - oqý baǵdarlamasynda teoriiaǵa basymdyq beriledi. Osy rette túlektiń daiyndyq deńgeiine tikelei bailanysty eńbekaqy kriteriii mańyzdy. Oqytýshylyq-professorlyq quramy myqty jáne saýatty baǵdarlamasy bar joǵary oqý ornyn bitirgen túlekter anaǵurlym báseke qabiletti ekenin taldaý kórsetken.
Joǵary eńbekaqy Batys Qazaqstan innovatsiialyq-tehnologiialyq ýniversitetiniń «Kólikti paidalaný jáne júk qozǵalysy men tasymaldaýdy uiymdastyrý» mamandyǵy boiynsha tirkelgen. Al Qazaq tehnologiia jáne biznes ýniversitetiniń «Jeńil ónerkásip buiymdarynyń tehnologiiasy jáne qurastyrylýy» mamandyǵy eń tómen baǵalanady eken.
2018 jyldyń sońyna deiin Ulttyq kásipkerler palatasy 29 mamandyq boiynsha reiting daiyndaýdy josparlap otyr.
