Qazaqstanda tabysy eń tómengi kúnkóris deńgeiiniń shamasyna jetpeitin halyq úlesi 1% artty. Bul týraly QR Strategiialyq josparlaý jáne reformalar agenttigi Ulttyq statistika biýrosynan málim etti, dep habarlaidy "Ult aqparat".
2020 jyly úi sharýashylyqtaryn zertteý deregi boiynsha, tabysy eń tómengi kúnkóris deńgeiiniń shamasyna jetpeitin halyq úlesi 5,3% qurady (2019 jyly – 4,3%).
2020 jyly kedeiliktiń eń joǵary mánderi tirkelgen óńirler:
- Túrkistan (12,2%) oblysy;
- Soltústik Qazaqstan (6,7%) oblysy;
- Shyǵys Qazaqstan (6,5%) oblysy
Kedeiliktiń eń az úlesi - Nur-Sultan (1,5%) qalasynda.
Qalalyq jáne aýyldyq jerdegi tabys aiyrmashylyǵy áli de bar. Máselen, qalalyq jerde tabysy eń tómengi kúnkóris deńgeiiniń shamasyna jetpeitin halyqtyń úlesi - 3,7%, al aýyldyq jerde 7,6% quraidy. 2020 jyly kedeiliktiń aýyldyq jáne qalalyq deńgeileri arasyndaǵy eń úlken aiyrmashylyq Atyraý (9,8 ese), Mańǵystaý (3,2 ese) oblystarynda baiqaldy.
«2020 jyly Djini koeffitsienti 0,291 qurady. Halyqtyń 10% eń az jáne 10% eń kóp qamtamasyz etilgen toptarynyń arasalmaǵy (qorlar koeffitsienti) 5,9 eseni qurady. Kedeiliktiń tereńdigi men ótkirligi sáikesinshe 0,8% jáne 0,2% boldy», - delingen Ulttyq biýro málimetinde.
