Búgingi tańda sýbsidiia alýǵa ótinim Almaty, Jambyl, Qostanai jáne Túrkistan oblystarynda qabyldanyp jatyr. Bul týraly Ortalyq kommýnikatsiialar qyzmetinde ótken kóktemgi egis jumystaryna daiyndyq týraly brifingide aityldy, dep habarlaidy QazAqparat.
«Jalpy, búginde aýyl sharýashylyǵy daqyldaryn sebý jumystary Almaty, Jambyl, Qyzylorda jáne Túrkistan oblystarynda júrgizilýde. Atap aitqanda, 67,8 myń ga jazdyq dándi daqyldar, 6,5 myń ga kartop, 10,3 myń ga kókónis daqyldary, 18,8 myń ga kópjyldyq shóp egilgen. Egis naýqany barlyq qajetti resýrstarmen qamtamasyz etiledi. Búgingi kúni 2,4 mln tonna tuqym toltyryldy, bul - jospardyń 100,2%», - deidi QR AShM ósimdik sharýashylyǵy ónimderin óndirý jáne qaita óńdeý departamentiniń direktory Azat Sultanov.
Onyń aitýynsha, 2021 jyly tuqym sharýashylyǵyn qoldaýǵa 11,8 milliard teńge bólinip, 82,1 myń tonna elitalyq tuqym men 3,8 million kóshet satyp alynady.
«Mineraldy tyńaitqysh satyp alýdy sýbsidiialaýǵa oblystardyń jergilikti biýdjetine 26,1 milliard teńge qarastyrylǵan. Oblystyq ákimdikterdiń jedel aqparatyna sáikes, respýblika agrariilerine kóktemgi dala jumysyn júrgizý úshin 117,6 myń tonna mineraldy tyńaitqysh jetkizildi. Búgingi tańda sýbsidiia alýǵa ótinim Almaty, Jambyl, Qostanai jáne Túrkistan oblystarynda qabyldanyp jatyr. Jaqyn ýaqytta Batys Qazaqstan jáne Soltústik Qazaqstan oblystarynda ótinish qabyldaý bastalady. Basqa aimaqtarda sýbsidiia tizimi men normalaryn bekitý sońǵy satyda. Premer-Ministr Úkimettiń búgingi otyrysynda standarttardy bekitýdi bir apta ishinde aiaqtaý týraly tiisti tapsyrma berdi», - deidi ol.
