Ulttyq ekonomika, densaýlyq saqtaý, qarjy ministrlikterinde qyzmetkerler aiyna 2 myńnan 5 myń saǵatqa deiin artyq jumys istegen. Bul týraly Memlekettik qyzmet isteri jáne sybailas jemqorlyqqa qarsy is-qimyl agenttigi memlekettik qyzmet salasyndaǵy baqylaý departamentiniń direktory Ravil Tiýlebaev málim etti, dep habarlaidy Baq.kz agenttigi.
Onyń aitýynsha, agenttik ortalyq jáne jergilikti atqarýshy organdar qyzmetkerleriniń jumys ornynda jumys ýaqyty aiaqtalǵannan keiin negizsiz qalýy, ári demalys jáne mereke kúnderi jumysqa shyǵýǵa qatysty monitoring júrgizgen.
«Nátijesinde memlekettik qyzmetshilerdiń belgilengen kesteni buza otyryp, jumysta qalý faktileri jalǵasýyn kórsetti. Mysaly, ulttyq ekonomika, densaýlyq saqtaý, qarjy ministrlikteriniń qyzmetkerleri aiyna 2 myńnan 5 myń saǵatqa deiin, al syrtqy ister, aýyl sharýashylyǵy, eńbek jáne áleýmettik qorǵaý, mádeniet jáne sport ministrlikterinde 200-den 600 saǵatqa deiin artyq jumys isteý faktileri anyqtaldy», - dedi Ravil Tiýlebaev brifingte.
Osy oraida ol artyq jumys jasaý derekteri jergilikti atqarýshy organdarda da anyqtalǵanyn jetkizdi.
«Aqmola oblysynda artyq jumys isteý kólemi 1 myń saǵattan asady. Qyzylorda, Soltústik Qazaqstan oblystarynda jáne Astana qalasynda 500 saǵattan astam artyq jumys isteý faktisi anyqtaldy. Onyń ústine bul ústeme jumys úshin ótemaqylar eshbir mekemede tirkelmegen», - dedi direktor.
Ravil Tiýlebaev atalǵan zań buzýshylyqtardy joiý maqsatynda tiisti usynystar ministrlikterge, oblystar ákimdikteri men Astana, Almaty, Shymkent qalalarynyń ákimderine joldanǵanyn atap ótti.
«Eńbek tártibin buzý týraly materialdardy zańnamaǵa sáikes shara qabyldaý úshin eńbek jáne halyqty áleýmettik qorǵaý ministrligine jáne óńirlerdegi eńbek inpektsiialaryna joldaǵandy», - dedi ol.
Esterińizge sala keteiik, buǵan deiin memqyzmetkerlerge syilyq bergender jaýapqa tartylatyny týraly habarlaǵan bolatynbyz.
