Qazaqstan Respýblikasynyń Aýyl sharýashylyǵy ministri Erbol Qarashókeev keshe, 8 qazanda Baladna Food Industries katarlyq kompaniiasy direktorlar keńesiniń táýelsiz múshesi Aidan Tynanmen kezdesti, dep habarlaidy "Ult aqparat" AShM baspasóz qyzmetine silteme jasap.
Kezdesý barysynda taraptar sútti baǵyttaǵy mal sharýashylyǵy salasyndaǵy ekijaqty yntymaqtastyq máselelerin talqylady.
Ministr óz sózinde sútti mal sharýashylyǵyn damytý Qazaqstandaǵy agroónerkásiptik keshendi damytýdyń ulttyq jobasy tujyrymdamasynyń negizgi basymdyqtarynyń biri bolyp tabylatynyn atap ótti.
Qazirgi ýaqytta 2021-2025 jyldary aralyǵynda jalpy óndiristik qýaty jylyna 597,7 myń tonna sút óndiretin 106,8 myń basqa arnalǵan 169 sút-taýar fermasyn iske qosý jónindegi jospar ázirlengen.
Sút-taýar fermalarynyń qosymsha qýattaryn iske qosý respýblikanyń ishki naryǵyn 2024 jyldyń sońyna qarai otandyq sút ónimderimen 100% - ǵa qamtamasyz etýge múmkindik beredi. Bul sáikesinshe sút ónimderin ózge elderge eksporttaý kólemin ulǵaitady.
Bul salaǵa sheteldik investitsiialardyń kelýi onyń josparly damýyna yqpal etedi. Búginde investorlarǵa «bir tereze» qaǵidaty boiynsha qyzmetterdiń tolyq spektri kórsetiledi. Sondai-aq, investitsiiadan keiingi kezeńde de tolyq monitoring júrgizilip, árbir investormen naqty jobalardyń aiasynda barlyq deńgeilerde tiisti jumystar atqarylady.
«Qazaqstan Respýblikasynyń zor investitsiialyq áleýeti bar. Biz investorlar úshin tiisti jaǵdai jasaý, investitsiialarǵa kepildik berý, olardyń qaýipsizdigin qamtamasyz etý jáne túrli táýekelderdi barynsha azaitý úshin barlyq qajetti jumystardy júrgizemiz», - dedi ministr.
Óz kezeginde Aidan Tynan Baladna Food Industries kompaniiasynyń qyzmeti jáne aldaǵy damý josparlary týraly aityp, sút ónimderin tutynýdyń ósýi jáne halyqtyń kóbeiýi esebinen bolashaqta sútti tutyný tek arta túsetinin atap ótti.
Aidan Tynannyń aitýynsha, Qazaqstan Respýblikasynyń Ońtústik-Shyǵys Aziia elderine sút jáne sút ónimderin eksporttaýshy el bolýyna barlyq múmkindikteri bar.
Sondai-aq, Aidan Tynan ministrge Qazaqstannyń kásipkerlerimen kezdesýler ótkizgenin jáne onda birqatar investitsiialyq jobalar tanystyrylǵany týraly habarlady. Atap aitqanda, Almaty qalasyndaǵy 250-den astam joǵary bilikti jumys oryndaryn qura otyryp, qýaty táýligine 150 tonna shikizat bolatyn irimshik óndirý zaýytyn salý jobasy týraly aitty.
Taǵy bir investitsiialyq joba Qostanai oblysynda jylyna 106 myń tonna ónim shyǵaratyn shiki siyr sútin óndirýge arnalǵan 8 sút-taýar fermasyn salý bolyp tabylady.
«Eksporttyq áleýetti damytý jáne innovatsiialyq ekonomikany damytý turǵysynan el aldyna qoiǵan maqsattardy eskere otyryp, Bizdiń kezdesýimiz óte mańyzdy ekenin atap ótkim keledi. Qazaqstan Respýblikasy Aýyl sharýashylyǵy ministrligi investitsiialyq jobalardy iske asyrýǵa qoldaý kórsetýge jáne jan - jaqty kómek kórsetýge daiyn», - dedi Erbol Qarashókeev.
Kezdesý qorytyndysy boiynsha taraptar kelissózder nátijelerine sáikes, barlyq aspektiler boiynsha yntymaqtastyqty jalǵastyrý týraly ýaǵdalasty.
Baladna Food Industries - Katarlyq sút-taýar fermasyna ielik etetin jáne jańa tabiǵi sút jáne sút ónimderin óndirýge mamandanǵan aýyl sharýashylyǵy kompaniiasy. Kompaniia Katardaǵy eń iri azyq-túlik jáne sút óndirýshisi, eldegi jańa sút ónimderiniń 95% - dan astamyn óndiredi.
