Joǵary jáne joǵary oqý ornynan keiingi bilim berý uiymdaryna qoiylatyn biliktilik talaptaryn jetildiriledi. Sonyń aiasynda barlyq joǵary oqý oryndary úshin memlekettik bilim berý granttarynyń qunyn ulttyq deńgeige deiin kóterý kózdelgen, dep habarlaidy QazAqparat.
Májilis depýtattarynyń saýalyna bergen jaýabynda Premer-Miniistrdiń orynbasary Eraly Toǵjanov osyndai málimet aitty.
«Bilim berý sapasyn qamtamasyz etý maqsatynda búgingi kúni joǵary jáne joǵary oqý ornynan keiingi bilim berý uiymdaryna (JJOKBU) qoiylatyn biliktilik talaptaryn jetildirý sharalary qabyldanýda. Tiisti buiryq jobasy ázirlendi, onda daiyndyq baǵyttarynyń erekshelikterin eskeretin jeke talaptar kózdelgen. Máselen, bilim berý uiymdaryna qoiylatyn biliktilik talaptarynyń jańa jobasynda «Quqyq», «Arhitektýra jáne qurylys», «Densaýlyq saqtaý» jáne t.b. daiarlaý baǵyttary úshin kadrlardy daiarlaýdaǵy erekshelikterdi qamtityn jeke 3 talap qarastyrylýda. «Pedagogikalyq ǵylymdar» kadrlar daiarlaý baǵyty boiynsha dýaldy oqytýdy júzege asyratyn bilim berý uiymdarymen jasalǵan sharttyń bolýy mindetti talapqa engizildi», - deidi vitse-premer.
Sonymen birge, Úkimet basshysynyń orynbasary ózi ataǵan buiryq jobasynda joǵary oqý oryndaryna «Arhitektýra jáne qurylys» baǵyty boiynsha aqparattyq modeldeý tehnologiiasyn jáne t.b. iske asyratyn arnaiy baǵdarlamalyq keshenniń bolýy týraly talap engizý usynylylǵanyn aitady.
«Jobada 2022 jyldan bastap joǵary oqý ornynan keiingi bilim berý baǵdarlamalary boiynsha kadrlar daiarlaýdy júzege asyratyn oqytýshylarǵa talaptar engizý qarastyrylǵan. Barlyq joǵary oqý oryndary úshin memlekettik bilim berý granttarynyń qunyn ulttyq deńgeige deiin kóterý, bul rette qatardaǵy ýniversitetter oqytýshylarynyń jalaqysyn olardyń deńgeiine deiin kóterý kózdelgen», - dep jazylǵan resmi jaýapta.
