Premer-ministrdiń orynbasary Jeńis Qasymbek qazaqstandyq mashina jasaý salasynda qandai ózgerister baryn aityp berdi, dep habarlaidy QazAqparat.
«Qazaqstandyq mashina jasaý salasy ósimniń óte joǵary dinamikasyn kórsetip otyr. Ótken jyly Qazaqstan ekonomikasynyń ósimi 4,1 paiyzdyq ósimdi kórsetse, mashina jasaý salasy 14 paiyzdyq ósimge jetti. Iaǵni, bul sala – Qazaqstan ekonomikasynyń negizgi draiveri boldy dep aýyz toltyryp aitýǵa bolady. Osy jyldyń jeti aiynyń kórsetkishi boiynsha bul tendentsiia jalǵasyn taýyp, Qazaqstan ekonomikasy 4,3 paiyzǵa ósse, mashina jasaý salasy 18 paiyzdyq ósimdi, al mashina quraý salasynyń jeke, atap aitqanda, avtokólik quraý sektorlary orasan zor – 156 paiyzdyq ósimge bir-aq sharyqtaǵan. Demek, bul kórsetkish Qazaqstannyń ekonomikasyna aitarlyqtai úlesin qosýda», - dedi Jeńis Qasymbek Nur-Sultandaǵy Qazaqstan mashina jasaýshylarynyń VII forýmynda.
Onyń aitýynsha, biyl 26 shildede Qazaqstannyń mashina jasaý salasynyń 2019-2024 jylǵa arnalǵan Jol kartasy bekitilgen.
«Bul qujat – salany damytýdyń strategiialyq keleshegi, negizgi damý baǵyttaryn aiqyndaýshy. Osy qujat arqyly otandyq kólik quraý salasynyń básekege qabilettiligin arttyrǵymyz keledi. Álbette, jańa tehnologiialarsyz bul jetistikke jetý múmkin emes. Negizgi basymdyqtardyń biri otandyq kásiporyndardyń ekporttyq áleýetin arttyrýǵa, investitsiia men salaǵa transulttyq kompaniialardy tartýǵa baǵyttalady», - dedi ol.
Vitse-premer óz sózinde «Saryarqaavtoóndiris» kásiporny aldyńǵy kúni ǵana Qytaida iri kelisimshartqa qol qoiǵanyn atap ótti.
«Kásiporyn óz kapitalyna álemdik eń iri kompaniialardyń biri – «JAC» kompaniiasyn engizý boiynsha kelisimge keldi. Ol kompaniia jylyna 1,5 mln avtokólik óndiredi. Biz Qostanaidaǵy alań arqyly birlese avtokólikterdi óndirmekpiz. Osylaisha, bizdiń áriptester kelisim EAEO, Ortalyq Aziiaǵa naryqtaryna shyǵýǵa serpin berer dep senim bildirýde. Iaǵni, biz bir-birimizdi tolyqtyryp otyrmyz», - dedi Jeńis Qasymbek.
Jeńis Qasymbek sonymen birge 15 shildede «KamAz» kásipornymen kelisimge qol qoiylǵanyn atap ótti.
«Bul kelisimder arqyly aýyr júk kólikteriniń jetekshi bilikterdiń quralyn jáne shoiyn quimasyn óndirýdi kózdeimiz. Bul aitýly jańalyq. Iaǵni, Qazaqstan «KamAz» sekildi kólikti óndirýshi elderdiń qataryna kirip otyr», - dedi ol.
Eske sala ketsek, Nur-Sultanda Qazaqstan mashina jasaýshylarynyń VII forýmy ótip jatyr. Forýmdy QR Indýstriia jáne infraqurylymdyq damý ministrligi men Qazaqstan mashina jasaýshylar odaǵy, «Samuryq-Qazyna» UÁQ» AQ uiymdastyrǵan. Biyl forým «Mashina jasaý – Qazaqstandy indýstriialandyrý draiveri» uranymen ótedi.
Jyl saiyn forýmǵa Germaniia, AQSh, Japoniia, Italiia, Chehiia, Resei, Qytai sekildi iri 20 memlekettiń delegattary qatysady. Osylaisha, otandyq kásiporyndar elden shyqpai-aq sheteldik áriptesterimen kezdesý ótkizýge múmkindik alady.
