QR Prezidenti Qasym-Jomart Toqaevtyń Koreia Respýblikasyna memlekettik saparynyń saltanatty rásimi týraly video jariialandy, dep habarlaidy "Ult aqparat".
Videony Prezidenttiń baspasóz hatshysy Berik Ýáli Facebook paraqshasynda jariialady. Úzindiden Qazaqstan basshysyn Ońtústik Koreia tarapy qalai qarsy alǵanyn kórýge bolady.
Eske salsaq, Prezident Qasym-Jomart Toqaevtyń Koreia Respýblikasyna memlekettik sapary Kók úidegi resmi rásimnen bastaldy. Qazaqstan Prezidentin Ońtústik Koreia Prezidenti Mýn Chje In saltanatty túrde qarsy alyp, qurmet kórsetti.
Sapar aiasynda Qazaqstan Prezidenti Koreianyń ulttyq batyry Hon Bom Donyń qurmetine orai ótken rásimge qatysty.
Ońtústik Koreia Prezidentiniń rezidentsiiasynda ótken ekijaqty kezdesýde taraptar qazaq-korei strategiialyq áriptestigin odan ary damytýdyń perspektivalaryn jan-jaqty talqylady. Sonymen qatar memleketter basshylary ǵalamdyq jáne aimaqtyq ózekti máselelerdi qarastyryp, halyqaralyq qurylymdardaǵy ózara yntymaqtastyqty talqylady.
Qasym-Jomart Toqaev Prezident Mýn Chje Inge korei jerinde kórsetilgen qurmet pen qonaqjailyǵy úshin rizashylyǵyn bildirdi. Memleket basshysy 2019 jyly Nur-Sultan qalasynda ótken kezdesýdiń qazaq-korei qarym-qatynasyna tyń serpin bergenin aitty.
Osy kezdesýden keiin qos eldiń Prezientteri Qasym-Jomart Toqaev pen Mýn Chje In BAQ ókilderi úshin brifing ótkizdi.
«Eki eldiń arasy alshaq bolǵanymen, halyqtarymyz – taǵdyrlas. Koreia – Qazaqstannyń Shyǵys Aziiadaǵy strategiialyq seriktesiniń biri. Qazir san salaly bailanysymyz qarqyndy damyp kele jatyr. Biz búgin osy qarym-qatynasty jańa deńgeige kóterý úshin ózara senim men qoldaýǵa negizdelgen kelissózder júrgizdik. Yqpaldastyqtyń tyń baǵyttaryn aiqyndadyq, – dedi Qazaqstan Prezidenti.
