Foto: Aqorda
Búgin Qazaqstan prezidenti Qasym-Jomart Toqaevtyń qatysýymen sheteldik investorlar keńesiniń 36-shy otyrysy ótti, dep habarlaidy «Ult.kz».
Astanadaǵy Táýelsizdik saraiynda ótken otyrys «Qazaqstannyń jańa investitsiialyq kezeńi» taqyrybynda boldy.
Keńestiń quramyna shetel tarapynan 32 iri transulttyq kompaniia men halyqaralyq uiymdardyń basshylary múshe retinde jáne 7 basshy baqylaýshy retinde kiredi.
Sharada Qazaqstanǵa investitsiia tartý, investitsiialyq ahýaldy jaqsartý jáne investorlarǵa tiimdi jaǵdai jasaý máseleleri talqylandy.
Qazaqstan prezidenti Qasym-Jomart Toqaevtyń aitýynsha ótken 2023 jyly elimiz 23 mlrd. dollar kóleminde investitsiia tartqan.
«Halyqaralyq menedjment institýtynyń málimetinshe, Qazaqstan álemniń básekege qabiletti 35 eliniń qataryna endi. Elge eń joǵary reiting berilýi tarihi jaǵdai. Biraq munymen toqtap qalýǵa bolmaidy. Investitsiialardy odan ári tartý boiynsha jumysty jalǵastyrý qajet», -dedi Memleket basshysy.
Prezident Toqaev óz sózinde 2029 jylǵa qarai Qazaqstan 150 million dollar kóleminde tikelei sheteldik investitsiia tartýdy josparlap otyrǵanyn aitty.
«Ol úshin investitsiialar tartý jónindegi memlekettik organdarǵa "osynda jáne qazir" qaǵidaty boiynsha jumys máselelerin sheshýge ókilettik berildi. Men Ulttyq ekonomikany aitarlyqtai liberalizatsiialaý úshin qural bolatyn Prezident Jarlyǵyna qol qoidym. Men osy múmkindikti paidalanyp, Qazaqstandaǵy investitsiialyq ortany jaqsartý jónindegi mindettemeni rastaǵym keledi», -dedi Qasym-Jomart Toqaev óz sózinde.
Aita keteiik, Sheteldik investorlar keńesi Qazaqstan Respýblikasy Prezidentiniń janyndaǵy konsýltativtik-keńesshi organ sanalady. Keńestiń qyzmetin qamtamasyz etýdi Qazaqstan Respýblikasy Prezidentiniń Ákimshiligi men Keńestiń jumys organy júzege asyrady.
Keńestiń negizgi mindetteri: Qazaqstan Respýblikasynyń investitsiialyq saiasatynyń negizgi baǵyttaryn aiqyndaý; Qazaqstan Respýblikasyndaǵy investitsiialyq ahýaldy jaqsartý; Qazaqstan Respýblikasynyń investitsiialar týraly normativtik quqyqtyq bazasyn jetildirý; Qazaqstan Respýblikasynyń ekonomikasyn ártaraptandyrýǵa, ónerkásiptik sektoryn indýstriialandyrýǵa, shaǵyn jáne orta biznesin damytýǵa sheteldik kompaniialardyń járdemdesýi; Qazaqstan Respýblikasynyń ekonomikasyn álemdik ekonomikalyq protsesterge integratsiialaý; Qazaqstan Respýblikasynyń ekonomikasyna sheteldik investitsiialardy tartý strategiiasy; Qazaqstan Respýblikasynyń halyqaralyq mańyzy bar iri investitsiialyq baǵdarlamalary men jobalaryn iske asyrý máseleleri boiynsha usynymdar men usynystar ázirleý.
