Volonterlik saǵattardy eńbek ótiline esepteýdiń ádistemesin engizý qajet. Bul týraly búgin Jastar jylynyń jabylý jáne Volonter jylynyń ashylý saltanatynda Memleket basshysy Qasym-Jomart Toqaev aitty, dep habarlaidy QazAqparat.
«Volonterler balalar úilerindegi balalardy qamqorlyqtaryna ala alady. «Saýlyq» baǵyty arqyly meditsinalyq volonterlik damyp, naýqastarǵa qamqorlyq kórsetiledi. «Taza álem» jobasy - bul qorshaǵan ortany qorǵaý, ózender men ormandardy tazalaý, aǵash otyrǵyzý, qoqysty suryptaýǵa úiretý. «Asyl mura» baǵyty volonterlerdi halqymyzdyń materialdyq jáne rýhani mádeni-tarihi murasyn saqtaýǵa tartady. «Qamqor» baǵyty eriktilerdiń qarttar úilerinde jumysyna baǵyttalǵan. «Bilim» - bul aýyl mektepteriniń joǵary synyp oqýshylaryn UBT-ǵa daiyndaý, aǵylshyn tili men kompiýterlik saýattylyqqa oqytý. Al «Úmit» jobasyn Ekinshi dúniejúzilik soǵystaǵy jeńistiń 75 jyldyǵyna orai otandastarymyzdyń erlikterin pash etetin qujattardy izdeýge baǵdarlaýǵa bolady», - dedi Qasym-Jomart Toqaev.
Memleket basshysy volonter-zańgerlerdi halyqtyń quqyqtyq saýatyn arttyrý jumystaryna, quqyqtyq máseleler boiynsha azamattarǵa konsýltatsiialyq kómek kórsetýge tartý qajettigin basa aitty.
«Úkimettik emes uiymdardy naqty qoldaý úshin memleket árbir baǵyt boiynsha granttar bóledi. Volonterlik saǵattardy eńbek ótiline esepteýdiń ádistemesin engizý de mańyzdy. Bul ásirese osy salada turaqty jumys isteitinderge qatysty. Menińshe, bul óte mańyzdy», - dedi QR Prezidenti.
