Foto: Aqorda
Memleket basshysy Qasym-Jomart Toqaev Resei Prezidenti Vladimir Pýtinmen telefon arqyly sóilesti, dep habarlaidy "Ult aqparat" Aqordanyń baspasóz qyzmetine silteme jasap.
Áńgimelesý barysynda taraptar Qazaqstan-Resei yntymaqtastyǵynyń qazirgi jai-kúii men perspektivalaryn talqylady.
Prezidentter saýda-ekonomika jáne energetika salalarynda buǵan deiin joǵary deńgeide qol jetkizilgen ýaǵdalastyqtardy tolyqtai júzege asyrý qajet ekenin atap ótti. Sondai-aq Vladimir Pýtinniń Astanaǵa josparlanǵan memlekettik saparyna daiyndyqtyń sapaly bolýyn qamtamasyz etýge kelisti.
Memleketter basshylary halyqaralyq kún tártibindegi ózekti máseleler jóninde pikir almasty. Qasym-Jomart Toqaev Qazan qalasynda ótetin BRIKS sammitine qatysýǵa shaqyrǵany úshin Resei Prezidentine rizashylyǵyn bildirdi.
