Memleket basshysy Qasym-Jomart Toqaev Shveitsariia Prezidenti Ýli Maýrermen shaǵyn quramda kelissóz júrgizdi, dep habarlaidy "Ult aqparat" Aqordaǵa silteme jasap.
Ekijaqty kelissózderdiń aldynda «Aqorda» rezidentsiiasynda Shveitsariia Prezidentin saltanatty túrde qarsy alý rásimi ótti. Eki eldiń memlekettik ánurandary shyrqalǵannan keiin Qurmetti qaraýyl rotasynyń bastyǵy raport berdi. Memleketter basshylary Qurmetti qaraýyldy aralap ótip, shaǵyn quramda kelissóz júrgizý úshin rezidentsiianyń «Shyǵys zalyna» bardy.
Qasym-Jomart Toqaev Shveitsariiany Qazaqstannyń Eýropadaǵy eń mańyzdy áriptesteriniń biri sanaitynyn aitty.
– Memleketterimiz arasynda barlyq sala boiynsha, ásirese ekonomika baǵytynda tatý yntymaqtastyq ornaǵan. Shveitsariia - Qazaqstan ekonomikasyndaǵy mańyzdy investorlardyń jáne negizgi saýda seriktesteriniń biri, – dedi Qazaqstan Prezidenti.
Memleket basshysy Shveitsariia Prezidentimen birge biznes-delegatsiia ókildiginiń de kelýi osy sapardyń mańyzyn arttyra túsetinin atap aitty.
Ýli Maýrer Qasym-Jomart Toqaevqa qonaqjailyq kórsetkeni úshin rizashylyq bildirip, Qazaqstandy óz eliniń asa mańyzdy seriktesi retinde qarastyratynyn jetkizdi.
– Biz saiasi qoldaý kórsetkenderińiz úshin shyn júrekten rizashylyq bildiremiz. Bizdiń maqsat-murattarymyz ortaq. Al ekonomikalyq bailanystarymyzǵa keler bolsaq, sońǵy jyldary bul salanyń damý qarqyny artyp keledi. Bizdiń ózara sapar almasýymyz qarym-qatynastarymyzdy odan ári nyǵaitýǵa septigin tigizedi dep oilaimyn, – dedi Shveitsariia Prezidenti.
