Foto: Aqorda
Memleket basshysy Abý-Dabide ótken saltanatty is-sharada kórsetilgen beineúndeýinde Ázerbaijan Prezidenti Ilham Áliev pen Armeniia Premer-ministri Nikol Pashiniandy sheih Zaid atyndaǵy «Adamzat baýyrlastyǵy» syilyǵyna ie bolýymen quttyqtady, dep habarlaidy Ult.kz.
Qazaqstan Prezidenti bul marapat olardyń parasatty kóshbasshylyǵyna berilgen baǵa ekenin atap ótti.
– Ázerbaijan men Armeniianyń beibit kelisim jolynda qol jetkizgen jetistigi tarihtyń betburys kezeńi sanalady. Bul qadam dialog júrgizip, jaýapkershilik pen ustamdylyq tanyta bilsek, uzaq jyldarǵa sozylǵan qaqtyǵystyń da túiinin tarqatýǵa bolatynyn dáleldeidi. Memleketterdiń jik-jikke bólinýi ulǵaiyp, ózara qarym-qatynastarǵa kóptep syzat túse bastaǵan zamanda bul tájiribeniń mańyzy zor. Óitkeni atalǵan mysaldan tatýlasýdyń álsizdik emes, myqtylyqtyń belgisi ekenin kóremiz, – dedi Qasym-Jomart Toqaev.
Prezident úndeýde Qazaqstan tarapynyń memleketimizge artylǵan senimdi, sonyń ishinde Ázerbaijan men Armeniia arasyndaǵy beibit kelisimderdiń negizgi bir kezeńin Almatyda ótkizý týraly sheshimdi joǵary baǵalaitynyn jetkizgen.
– Bul jaǵdai «syndarly dialog – ornyqty damýdyń kepili» degen ortaq kózqarasymyzdy aiǵaqtaidy. Qazaqstan Eýraziia keńistigindegi jáne odan tysqary jerlerdegi beibitshilikti, senim men yntymaqtastyqty nyǵaitýǵa baǵyttalǵan bastamalardy dáiekti túrde qoldap keledi, – dedi Memleket basshysy.
Qasym-Jomart Toqaev syilyqtyń beibitshilikti nyǵaitý isinde airyqsha ról atqaratynyna nazar aýdaryp, atalǵan qundylyqtardy udaiy ilgeriletkeni úshin BAÁ Prezidenti sheih Muhammed ben Zaid Ál Nahaianǵa rizashylyǵyn bildirdi.
– Sheih Zaid ben Sultan Ál Nahaiannyń toleranttyq, ózara qurmet pen beibit qatar ómir súrý idealdaryna negizdelgen óshpes ósiet-ónegesi osy marapatta kórinis tapqan. Bul qaǵidattar naqty saiasi nátijege ulasyp otyr. Ázerbaijan men Armeniia arasynda beibitshilik ornap, yntymaqtastyqtyń jandanýy osy qasterli amanatqa jańa mazmun darytyp, onyń aimaqtan tys jerlerde de ózekti ekenin kórsetti. Halyqaralyq qatynastardaǵy pármendi qural retinde diplomatiiaǵa senimdi kúsheite tústi, – dedi Memleket basshysy.
Qazaqstan Prezidentiniń pikirinshe, Ázerbaijan men Armeniia basshylarynyń beibitshilik ornatýǵa degen shynaiy nieti milliondaǵan adamǵa úmit syilady, tatý kórshilik qatynastar men turaqtylyq jahandyq kún tártibinde árdaiym mańyzdy ekenin álemdik qaýymdastyqqa anyq ańǵartty.
Sheih Zaid atyndaǵy «Adamzat baýyrlastyǵy» syilyǵy – 2019 jyly taǵaiyndalǵan táýelsiz halyqaralyq marapat. Onyń maqsaty – beibitshilikti, ózara túsinistikti nyǵaitýǵa, sondai-aq halyqtar men mádenietter arasyndaǵy yntymaq pen tatýlyqty dáripteýge eleýli úles qosqan tulǵalardy yntalandyrý.
Ár jyldary Rim Papasy Frantsisk, BUU Bas hatshysy Antoniý Gýterrish, IMAD qaýymdastyǵynyń negizin qalaýshy ári ekstremizmmen kúres boiynsha belsendi Latifa Ibn Ziaten, Iordaniia Koroli II Abdalla, Patshaiym Raniia jáne basqa da qairatkerler syilyq laýreattary atandy.
