Shámshi shyǵarmashylyǵy – ulttyń baǵa jetpes bailyǵy. QR Prezidenti Qasym-Jomart Toqaev osylai málim etti, dep habarlaidy "Ult aqparat".
«Búgin elimizdiń Ánurany «Meniń Qazaqstanym» ániniń avtory, ult rýhaniiatyna talai syrly saz ben ásem áýen syilaǵan kompozitor Shámshi Qaldaiaqovtyń týǵanyna 90 jyl toldy. Shámshi shyǵarmashylyǵy – ulttyń baǵa jetpes bailyǵy. Onyń týyndylaryn keńinen nasihattaý – búgingi urpaqtyń paryzy», dep jazdy Qasym-Jomart Toqaev Twitter-degi paraqshasynda.
Eske sala ketsek, búgin aty ańyzǵa ainalǵan sazger, qazaq valsiniń koroli Shámshi Qaldaiaqovtyń týǵanyna 90 jyl toldy.
Osyǵan orai QR Mádeniet jáne sport ministrliginiń uiymdastyrýymen «Meniń Qazaqstanym» halyqaralyq mýzykalyq chellendji bastaldy. Áýendi marafon Qazaqstannyń halyq ártisi, QR Ánurany áýeniniń avtory Shámshi Qaldaiaqovtyń týǵan kúnine arnaldy.
