Prezident Qasym-Jomart Toqaev Resei Úkimetiniń tóraǵasy Mihail Mishýstinmen kezdesti, dep habarlaidy "Ult aqparat" Aqordanyń resmi saityna silteme jasap.
Kezdesý barysynda Qazaqstan men Resei prezidentteriniń búgingi kelissózderiniń qorytyndysy boiynsha qol jetkizilgen ýaǵdalastyqtardy júzege asyrý máseleleri talqylandy.
– Elderimiz arasyndaǵy strategiialyq seriktestik pen shynaiy odaqtastyq qatynastardy ilgeriletý úshin kóp jumys isteý kerek. Bar kúsh-jigerdi kún tártibine engizilgen máseleler boiynsha naqty nátijelerge qol jetkizý úshin jumsaý qajet. Men jańa ǵana Vladimir Vladimirovichpen uzaq ári tiimdi kelissóz júrgizdim. Biz yntymaqtastyǵymyzdy nyǵaitýǵa, halyqaralyq jáne óńirlik jaǵdaiǵa qatysty barlyq másele boiynsha sóilestik, – dedi Qasym-Jomart Toqaev.
Memleket basshysy Qazaqstannyń jańa Úkimetimen júieli jumys isteýdiń mańyzdy ekenin atap ótti.
– Sizderdiń ókilderińiz ben Qazaqstannyń jańa Úkimeti arasyndaǵy bailanystarǵa tyń serpin bergim keledi. Qarym-qatynastar Resei Úkimetimen aradaǵy iskerlik, belsendilik jáne óte tyǵyz bailanystardy jalǵastyrýǵa baǵyttalýy kerek, – dedi Prezident.
Onyń aitýynsha, Qazaqstan men Reseidiń Kamaz, Sibýr jáne basqa da jetekshi kompaniialarynyń qatysýymen júzege asyrylyp jatqan strategiialyq sipaty zor mańyzdy birlesken jobalary bar. Bul jobalar óndiristik kooperatsiiany keńeitýge, jańa jumys oryndaryn ashýǵa, eki eldiń ónerkásiptik jáne tehnologiialyq áleýetin kúsheitýge baǵyttalǵan. Sonymen qatar Qazaqstan tarapy Eýraziialyq ekonomikalyq odaq aiasynda tyǵyz yqpaldastyq ornatýǵa nietti.
Óz kezeginde Mihail Mishýstin eki el arasyndaǵy dostyq pen yntymaqtastyqty damytý úshin Qasym-Jomart Toqaevtyń Máskeýge jasaǵan saparynyń mańyzy zor ekenin atap ótti.
– Resei Federatsiiasynyń Úkimeti joǵary deńgeide qol jetkizilgen ýaǵdalastyqtardy oryndaý úshin barlyq qajetti sharany qabyldaitynyn málimdeimin, – dedi Mihail Mishýstin.
Kezdesý sońynda Qazaqstan Prezidenti ekonomikalyq kooperatsiianyń memleketterimiz arasyndaǵy yntymaqtastyqtyń strategiialyq maqsatyna sai keletinine senim bildirdi.
