Memleket basshysy Qasym-Jomart Toqaev Resei Prezidenti Vladimir Pýtinmen telefon arqyly sóilesti, dep habarlaidy Aqorda.
Memleket basshylary ekijaqty yntymaqtastyq pen Eýraziialyq ekonomikalyq odaq aiasyndaǵy ózara is-qimyl máselelerin egjei-tegjeili talqylady.
Qazaqstan Prezidenti eki eldiń pandemiiaǵa qarsy kúres jumystaryna oń baǵasyn berdi. Qaraǵandy qalasynda «Spýtnik V» vaktsinasynyń óndirisi iske qosyldy. Eki eldiń úkimetteri reseilik vaktsinany Qazaqstanǵa jetkizý týraly kelisimge keldi.
Ózara ýaǵdalastyqtar men tapsyrmalardy oryndaý maqsatynda eki el úkimetteri bir-birimen tyǵyz qarym-qatynasta jumys istep, naqty sheshimder qabyldap jatyr. Biyl Kókshetaý qalasynda Qazaqstan men Reseidiń aimaqaralyq yntymaqtastyq forýmyn ótkizý týraly kelisim jasaldy. Al ony ótkizý formasyna qatysty naqty sheshim epidemiialyq jaǵdaiǵa bailanysty qabyldanady.
Vladimir Pýtin Qasym-Jomart Toqaevtyń Eýraziialyq ekonomikalyq odaqty odan ári damytýǵa jáne onyń áleýeti men bedelin nyǵaitýǵa qatysty barlyq usynystarymen kelisti. Prezidentter atalǵan integratsiialyq birlestiktiń qyzmetine qatysty máselelerdi sheshý úshin ózara tyǵyz bailanysta jumys isteýge ýaǵdalasty.
Taraptar halyqaralyq naryqtaǵy búgingi úderister men syn-qaterlerdi eskere otyryp, energetika salasyndaǵy birlesken jumystardy jalǵastyrýǵa kelisti.
Memleket basshylary ekijaqty yntymaqtastyq pen Eýraziialyq integratsiianyń negizgi problemalaryna qatysty eki eldiń ustanymdary men kózqarastarynyń sáikes keletinine kóńilderi tolatynyn aitty.
