Jumys saparymen Máskeýge barǵan Qazaqstan Prezidenti Qasym-Jomart Toqaev Resei Prezidenti Vladimir Pýtinmen kezdesý ótkizdi, dep habarlaidy "Ult aqparat" Aqordaǵa silteme jasap.
Kún tártibinde Aýǵanstandaǵy jaǵdaiǵa qatysty óńirlik qaýipsizdik, sondai-aq Qazaqstan men Resei arasyndaǵy yntymaqtastyq jáne integratsiialyq bailanystar aiasyndaǵy ózara is-qimyl máseleleri qaraldy.
Memleket basshysy Resei Prezidentine Máskeýge shaqyrǵany úshin alǵys bildirdi.
– Shyn máninde, bizdiń bailanystarymyz eshqashan toqtaǵan joq. Pandemiia kezinde de onlain júiesinde jáne telefon arqyly bailanysyp turdyq. Degenmen, júz ret estigennen bir ret kórgen jaqsy, – dedi Qasym-Jomart Toqaev.
Qazaqstan Prezidenti eki el arasyndaǵy barlyq baǵyttaǵy ózara yntymaqtastyqqa joǵary baǵa berdi.
– Qazaqstan men Resei – odaqtas elder. Biz halyqaralyq kún tártibindegi ózekti máselelerdi, qaýipsizdikti, ásirese ekijaqty yntymaqtastyqty únemi pysyqtap otyramyz. Elderimiz arasyndaǵy qatynastarymyz strategiialyq áriptestik baǵytynda damyp otyrǵany qýantady, – dedi Memleket basshysy.
Vladimir Pýtin eki el arasyndaǵy tyǵyz bailanystardy atap ótti.
– Bizdiń bailanystarymyz úzilgen joq. Qatynastarymyzdy turaqty, óte joǵary deńgeide jáne barlyq baǵyttar boiynsha júrgizip kelemiz. Bul – parlamentaralyq jáne úkimetaralyq bailanystar. Jaqynda ǵana bizdiń Úkimetimizdiń basshysy Qazaqstanda jumys saparymen bolyp, aýqymdy sharýalar atqardy jáne barlyq kezdesýler boiynsha maǵan baiandap otyrdy. Pandemiiaǵa qaramastan birinshi jarty jyldyqtaǵy taýar ainalymy 33 paiyzǵa artty. Halyqaralyq uiymdarda, sonyń ishinde Shanhai yntymaqtastyq uiymy, Eýraziialyq ekonomikalyq odaq arqyly da bailanys ornattyq. Barlyq baǵyttar boiynsha ilgerileýshilik bar. Odaqtastyq bailanystarymyz nyǵaiyp, jańa sapada tyń múmkindikterge jol ashylýda, – dedi Resei Prezidenti.
Qasym-Jomart Toqaev ekijaqty saýda-ekonomikalyq bailanystar men óńiraralyq qatynastardy nyǵaitýdy qoldady.
– Jańa ǵana ekijaqty taýar ainalymynyń naqty sanyn aittyńyz. Buǵan qosa kórshiles óńirlerimizdiń taýar ainalymy 70 paiyzdy quraitynyn da aita ketken jón. Óńiraralyq yntymaqtastyq forýmynda kezdesýdi josparlap otyrmyz. Qazan aiyndaǵy kezdesý júzbe-júz ótpese de, onlain bailanysta bolady. Odaqtas bailanystarymyzǵa tyń qarqyn beretin bul kezdesýdi jurtshylyq kútip otyr, – dep atap ótti Memleket basshysy.
Resei Prezidenti óz kezeginde jahandyq jáne aimaqtyq qaýipsizdiktiń ózekti máselelerine erekshe mán berdi.
– Árine, qazirgi tańda eń ózekti másele – qaýipsizdik. Ásirese, Aýǵanstandaǵy jaǵdai ýshyǵyp barady. Dúisenbi kúni Ujymdyq qaýipsizdik shart uiymy aiasynda beinekonferentsiia rejiminde jinalyp, pikir almasamyz dep úmittenemin. Odan keiin qyrkúiekte Shanhai yntymaqtastyq uiymy jáne Ujymdyq qaýipsizdik shart uiymy aiasynda josparly jumysymyzdy júrgize beremiz, – dedi Vladimir Pýtin.
Qasym-Jomart Toqaev týyndap otyrǵan syn-tegeýrinderge bailanysty eki el arasyndaǵy ózara is-qimyldardyń mańyzdy ekenin atap ótti.
– Shyn máninde, biz qaýipsizdik máselesine qatysty saiasatymyzdy únemi keńesip júrgizemiz. Bul másele, ásirese, Aýǵanstandaǵy jaǵdaiǵa kelgende asa ózekti. Aldaǵy is-qimyldarymyzdy júieleý úshin Sizdiń osy jaǵdaiǵa qatysty pikirińizdi bilgim keledi, – dedi Qazaqstan Prezidenti.
