BUU Bas Assambleiasynyń 74-shi sessiiasy aiasynda Memleket basshysy BUU Órkenietter Aliansynyń Joǵary ókili Migel Anhel Moratinospen kezdesti.
Taraptar ózara is-qimyl perspektivalaryn, atap aitqanda, dinaralyq kelisim men órkenietterdiń jahandyq dialogyn nyǵaitý jaiyn talqylady.
Qazaqstan Prezidenti Órkenietter Aliansy beibitshilikti, yntymaqtastyqty qamtamasyz etýge jáne órkenietaralyq dialogty qoldaýǵa úlken úles qosyp kele jatqan bedeldi halyqaralyq institýttardyń biri ekenin atap ótti.
- Qazaqstan Órkenietter Aliansymen belsendi yntymaqtastyqqa daiyn. Elimizdiń delegatsiiasy Alians forýmdaryna turaqty túrde qatysady, - dedi Qasym-Jomart Toqaev.
Prezident halyqaralyq uiymnyń basshysyna Álemdik jáne dástúrli dinder liderleri seziniń jumysyn turaqty qoldap kele jatqanyna jáne 2018 jyldyń qazan aiynda ótken VI Sezine belsendi qatysqany úshin alǵysyn bildirdi.
Sonymen qatar, Memleket basshysy 12 qyrkúiekte BUU shtab-páterinde BUU Bas hatshysy Antoniý Gýterrish usynǵan dini ǵibadat oryndaryn qorǵaý boiynsha Alians ázirlegen is-qimyl josparynyń iske asyryla bastaǵanyn qoldaitynyn aitty.
Óz kezeginde, Migel Anhel Moratorinos Qasym-Jomart Toqaevty Qazaqstan Prezidenti laýazymyna sailanýymen quttyqtap, elimizdiń mádeniet pen órkenietaralyq dialogty damytý isindegi eńbegine joǵary baǵa berdi.
