Qasym-Jomart Toqaev QHR iskerlik orta ókilderimen kezdesti, dep habarlaidy "Ult aqparat" Aqordaǵa silteme jasap.
Iskerlik ortamen jiynnyń ashylýynda Prezident Qasym-Jomart Toqaev Qazaqstan men Qytaidyń 27 jyldyq yntymaqtastyǵynyń nátijesinde eki el arasynda qarym-qatynas nyǵaiyp, jan-jaqty strategiialyq áriptestik qalyptasqanyn aitty. Buǵan eki eldiń joǵary deńgeide senimdi dialog ornatýy negiz bolǵanyn da tilge tiek etti. Qasym-Jomart Toqaev óz sózinde eki memleket arasyndaǵy bailanystyń nyǵaiýyna Qazaqstannyń Tuńǵysh Prezidenti – Elbasy Nursultan Nazarbaev pen QHR Tóraǵasy Si Tszinpinniń dostyǵy zor úles qosqanyn da basa atap ótti.
Prezident Qazaqstan men Qytaidyń ekonomikalyq yntymaqtastyǵynyń bolashaǵy zor dep esepteidi. Eki jaqty áriptestiktiń basym baǵyttaryn atap ótken Memleket basshysy eki eldiń biznes-ókilderi bolashaqta atqaratyn jańa mindetterge de toqtaldy.
Atap aitqanda, Qasym-Jomart Toqaev aldaǵy ýaqytta innovatsialyq jáne ǵylymi-tehnikalyq baǵyttarǵa zor yqylas bólý kerektigine toqtaldy. Sondai-aq, ol atalǵan baǵyttarda Qazaqstan Qytaimen birlesip jumys isteýge daiyn ekenin de jetkizdi.
Prezident týrizm salasy boiynsha da oi qozǵap, ózara iskerlik bailanys pen rekreatsiialyq týrizm úlken qarqynmen damyp jatqan Qazaqstanǵa qytailyq týristerin tartýǵa da mol múmkindik baryn aitty. Osy rette Memleket basshysy kórshi eldiń iskerlik ortasyn Qazaqstanda qytailyq 5A standarttaryna sáikes týristik ortalyqtar salýǵa shaqyrdy.
Qasym-Jomart Toqaev Qazaqstan men Qytai arasyndaǵy qarjy salasyndaǵy qarym-qatynastyń múmkindigi zor ekenine toqtaldy. Bul máselede «Astana» halyqaralyq qarjy ortalyǵynyń mańyzdy ról atqaratynyn eske saldy. Prezident «Astana» HQO bazasynda RMB Connect mehanizmi qurylatynyn jetizdi.
– RMB Connect jobasy iýanmen investitsiialar salýǵa múmkindik beredi. Jańa ekojúie Qytai iýaniniń álemge taralýyna eleýli úles qosatynyna jáne Qazaqstan kásiporyndary men óńirdegi ózge elder úshin iýanmen operatsiia jasaý boiynsha jańa esep aiyrysý-kliring ortalyǵyna ainalatynyna senimdimin,– dedi Memleket basshysy.
Sóz sońynda Qasym-Jomart Toqaev qazirgi jaǵdaida «Bizneske arnalǵan úkimet» (Government to Business) formatyndaǵy ózara is-qimyl iskerlik yntymaqtastyqty jandandyrýdyń pármendi quraldarynyń biri bolyp tabylatynyn atap ótti.
Prezident aitqandai, bul kezdesý Qazaqstan men Qytaidyń saýda-ekonomikalyq áriptestigin tereńdetýge naqty qadam bolady.
Dóńgelek ústel barysynda iri qytai kompaniialarynyń ókilderi, onyń ishinde «China General Technology (Group) Holding Co., Ltd» bas direktory Lý Imin, Qytai eksport-import bankiniń vitse-prezidenti Nin Iýn, Qytai-Eýraziialyq Ekonomikalyq Yntymaqtastyq qorynyń Basqarma Tóraǵasy Chjan Shili, «China Construction Bank» Baqylaý keńesiniń tóraǵasy Van Iýntsin, «COFCO Group» vitse-prezidenti Lýan Jichen, «Anhui Jianghuai Automobile Co., Ltd» An Tszin jáne basqalar sóz sóiledi.
