Qazaqstan ashyq ári ádiletti sailaý ótkizýge daiyn.
Resei Federatsiiasynyń tóraǵalyǵymen videokonferentsiia formatynda ótip jatqan Ujymdyq qaýipsizdik týraly shart uiymy Ujymdyq qaýipsizdik keńesiniń sessiiasyna Parlamenttiń tómengi palatasynyń sailaýy týraly Memleket basshysy Qasym-Jomart Toqaev osylai dedi, dep habarlaidy "Ult aqparat".
«COVID-19 pandemiiasy álemdik saiasat pen ekonomikany shatqaiaqtatyp jiberdi. Jaǵdaidy saýda soǵystaryna ulasqan ózara sanktsiialar men shekteýler tipti ýshyqtyryp tur. Ekstremizm, terrorizm, esirtki saýdasy, kiberqaýipsizdik pen zańsyz kóshi-qon salasyndaǵy jahandyq tegeýrinderdiń artyp bara jatqany da alańdatady. Osyndai jaǵdaida beibitshilikti nyǵaityp, aimaqtaǵy qaýipsizdik pen turaqtylyqty qamtamasyz etý jolyndaǵy memleketaralyq mehanizm retindegi bizdiń uiymnyń róli aitarlyqtai arta túsedi. Osy múmkindikti paidalana otyryp, pandemiiany eńserýge ún qosqanyńyz úshin qurmetti Vladimir Vladimirovich (RF prezidenti Pýtinge) sizge alǵysymdy aitqym keledi. Taiaý arada Qazaqstanda reseilik vaktsinany ázirleitin zaýyt salynady», - dedi Qasym-Jomart Toqaev sessiiada.
Prezident sonymen qatar sessiiaǵa qatysýshylarǵa Qazaqstanda elektoraldy kezeń bastalyp jatqanyn aityp ótti.
«2021 jylǵy 11 qańtarda Parlamenttiń tómengi palatasy men jergilikti ókildik organdarynyń sailaýy ótedi. Sailaý konstitýtsiialyq merzimde bolady. Partiialardyń bárine daiarlanýǵa jetkilikti ýaqyt berildi. Biyl biz teńdessiz demokratiialyq reformalar paketin qabyldadyq. Olar kóppartiialylyqty jáne partiialyq básekelestikti damytýǵa, azamattyq belsendilikti arttyrýǵa baǵyttalǵan. Atap aitqanda zańnamalyq deńgeide parlamenttik oppozitsiia institýty bekitilip, partiialyq tizimge jastar men áielderdiń úlesi úshin 30 paiyzdyq kvota bólindi. Biz ashyq ári ádiletti sailaý ótkizýge niettimiz. Seriktesterimizdiń qoldaýy men osy elderdiń baqylaýshylaryn kútemiz», - dedi Qasym-Jomart Toqaev.
