Qazaqstan Prezidenti Qasym-Jomart Toqaev alǵash ret ótip otyrǵan Aziia qalamgerleriniń I forýmyna qatysýshylardy quttyqtap, jumystaryna sáttilik tiledi.
Memleket basshysy óz sózinde halqymyzdyń rýhani muralaryn saqtap, ulttyq tarihyn zertteýge, mádenietin jan-jaqty qoldaýǵa árdaiym basa mán beretinin aitty. Sondai-aq, búginde qazaq ádebieti álem ádebietiniń damý kóshine qosylǵanyn atap ótti.
– Búginde tól ádebietimizdiń kókjiegi keńeiip, álem ádebietiniń damý kóshine qosyldy. Qazaq qalamgerleriniń týyndylary arqyly Dúnie júzi jurtshylyǵy ulttyq rýhaniiatymyzdy tanyp bilýde. Qazaqstandyq 30 jazýshy men 31 aqynnyń shyǵarmalary Birikken Ulttar Uiymynyń 6 tiline aýdarylyp, jaryqqa shyqqaly otyr. Osy týyndylar 5 qurlyqtaǵy 90-nan astam elge, iaǵni eki jarym milliard oqyrmanǵa taraidy, – dedi Qasym-Jomart Toqaev.
Memleket basshysynyń aitýynsha, Aziia – uly órkenietterdiń dúniege kelýine, órken jaiýyna, qalyptasýyna kýá bolǵan kóne qurlyq. Arab, parsy, qytai, úndi órkenietteri – adamzat tarihynyń ajyramas bóligi.
– Qazir Uly Jibek Jolynyń ekonomikalyq mán-mańyzy ǵana kóbirek aitylady. Shyn máninde, onyń tutas órkenietterdi toǵystyratyn kúshke ie bolǵany eskerile bermeidi. Búginde Aziianyń ozyq ekonomikasymen birge ádebieti, óneri, bilim júiesi de aldyńǵy qatarǵa shyqty. Aziia halyqtarynyń sóz óneri bai, tamyry tereńde, – dep atap ótti Memleket basshysy.
Qazaqstan Prezidenti Aziia ádebietin odan ári damytý úshin birqatar mańyzdy máselelerge qalamgerlerdiń nazaryn aýdartyp, arnaiy syilyq taǵaiyndaý týraly usynys bildirdi.
– Aziia qalamgerleri forýmy shyǵarmashyl qaýymnyń mańyzdy dialog alańyna ainalýy kerek. Bul mańyzdy shara Aziia elderinde turaqty túrde ótýi qajet dep sanaimyn. Adamzatty tolǵandyrǵan kúrdeli máseleler dál osyndai alańdarda ortaǵa salynýy tiis. Aziiany búkilálemdik rýhani damý ortalyǵy retinde damytý airyqsha mańyzdy. Sondyqtan ádebi úderisterdi jańǵyrtý úshin jaǵdai jasaý – basty mindetterdiń biri. Osy maqsatta «Aziia alyby» halyqaralyq ádebi syilyǵyn taǵaiyndaǵan jón, – dedi Qasym-Jomart Toqaev.
Sonymen qatar, Memleket basshysy Aziia qalamgerleri týyndylarynyń birtutas elektrondy kitaphanasyn qurý týraly usynys aitty.
«Aziia qalamgerleri týyndylarynyń birtutas elektrondy kitaphanasyn quratyn ýaqyt jetti. Bul - Aziianyń teńdessiz dúnietanymy jinaqtalǵan baǵa jetpes asyl qazynanyń esigin jer júzine aiqara ashatyn qundy dúnie bolary sózsiz. Osyndai igi bastamalardy iske asyrý jumysy – qalamgerlerimizdi biriktirip, Aziia ádebietin jańa beleske shyǵarady dep senemin. Búgingi forým jumysyn tabys tileimin», – dedi el Prezidenti.
Aziia qalamgerleriniń I forýmy álemniń 300 aqyn-jazýshysynyń basyn qosty. Olardyń arasynda Aziianyń 38 elinen kelgen Nobel syilyǵynyń nominanttary, halyqaralyq Býker jáne ASEAN syilyqtarynyń laýreattary, óńirlik jáne ulttyq syilyqtardyń iegerleri bar.
