Foto: akorda.kz
Qasym-Jomart Toqaev Almaty qalasyna jumys saparymen baryp, qańtar oqiǵasynyń qurbandaryna arnalǵan «Taǵzym» memorialynyń ashylý rásimine qatysty, dep habarlaidy "Ult aqparat" Aqordanyń resmi saityna silteme jasap.
Prezident stellaǵa gúl shoǵyn qoiǵan soń qańtar oqiǵasynda qaza tapqan azamattardy eske alý úshin bir minýt únsizdik jariialandy. Sodan keiin Memlekettik gimn oryndaldy.
Memleket basshysy jinalǵandar aldynda sóilegen sózinde búgingi sharanyń elimiz úshin airyqsha máni bar ekenin atap ótip, qasiretti qańtardan beri bir jylǵa jýyq ýaqyt ótkenin, bul táýelsizdik kezeńindegi eń kúrdeli oqiǵanyń biri bolǵanyn aitty.
«Sol kúnderi halqymyzǵa zor qaýip tóndi. Memlekettigimizdiń tuǵyry shaiqala jazdady. Tipti, «el bolyp qalamyz ba, joq pa» degen suraq týdy. Biraq biz myzǵymas birligimizdiń arqasynda qaterdiń betin qaitardyq. Eldigimizdi tanyttyq, myqty memleket ekenimizdi kórsettik. El ishine iritki salǵysy kelgen toptarǵa tosqaýyl qoiyp, jymysqy árekettiń jolyn kestik. Birqatar qalada ótken beibit sherýler jappai tártipsizdikke ulasty. Ásirese, táýelsizdigimizdiń altyn besigi – Almaty qalasy qatty zardap shekti. Qaraqshylar qalany qiratty. Kúshtik qurylymdarǵa shabýyl jasap, qarý-jaraq qoimalaryn tonady. Sonyń kesirinen jazyqsyz adamdar opat boldy. Qiraǵan dúnieni qalpyna keltirýge bolady. Biraq úzilgen ómir qaita jalǵanbaidy. Mundai oqiǵa eshqashan qaitalanbaýy úshin biz qoldan kelgenniń bárin jasap otyrmyz. Elimizdiń amandyǵyn, jerimizdiń tutastyǵyn qorǵaý – bárimizdiń perzenttik paryzymyz. Bul maqsat – Prezident retinde men úshin eń qasietti borysh. Turaqtylyq pen tatýlyq bolsa ǵana, osy mindetti oidaǵydai oryndai alamyz», – dedi Memleket basshysy.
Qasym-Jomart Toqaev qańtar qasireti el tarihyndaǵy úlken synaq retinde halqymyzdyń jadynda saqtalatynyn atap ótip, Almatyda «Taǵzym» memorialyn ornatýdy jón kórgenin jetkizdi.
«Shyn máninde, bul eskertkishtiń maǵynasy tereń, mańyzy óte zor. Munda Qazaq eliniń memlekettigin nyǵaitý jolyndaǵy qily kezeńder kórinis tapqan. Tas tuǵyrlarǵa áigili tulǵalarymyzdyń óleńderi jáne ósietteri jazylǵan. Ultty uiystyratyn osy sózder árqaisymyzǵa oi salady. Bul memorialdy qańtarda qaza bolǵan azamattardyń rýhyna taǵzym retinde turǵyzdyq. Sondai-aq ony keiingi urpaqqa taǵylym bolsyn dep ornattyq. Men osy memorialdyń boi kóterýine atsalysqan sáýletshilerge jáne barlyq azamattarǵa rizashylyǵymdy bildiremin», – dedi Prezident.
Memleket basshysy qandai jaǵdai bolsa da, elimiz reforma jolymen ilgeri dami beretinin jetkizdi.
«Halqymyz myqty memleket qurýǵa, qasietti táýelsizdigimizdi nyǵaitýǵa jáne qorǵaýǵa bel býǵanyna senimdimin. Biz saiasi júieni odan ári demokratiialandyrýǵa, ulttyq ekonomikany monopoliiadan aryltýǵa jáne onyń básekege qabiletin arttyrýǵa baǵyttalǵan aýqymdy reformalardy jalǵastyramyz. Jyl basynan beri qysqa merzim ishinde biraz is atqaryldy. Biz jalpyhalyqtyq referendým arqyly jańa Konstitýtsiiamyzdy qabyldadyq. Qazir aldymyzda aýqymdy ári kúrdeli jumys tur. Biz tutas el bolyp jańǵyrý jáne jańarý jolyna aiaq bastyq. Árine, bul – tek basy ǵana, bul joldyń ońai bolmaityny anyq. Biraq bizdiń basty maqsatymyz barshaǵa aiqyn. Bul – Ádiletti Qazaqstandy qurý jáne bárine birdei múmkindik beretin qoǵam qalyptastyrý. Biz árqashan birge bolsaq, mindetti túrde maqsatymyzǵa jetemiz. Men buǵan kámil senemin», – dedi Qasym-Jomart Toqaev.
Memleket basshysy myńdaǵan otandasymyzdyń – volonterlerdiń, dárigerler men politseilerdiń jáne qarapaiym adamdardyń qańtar oqiǵasy kezinde shynaiy batyldyq pen joǵary azamattyq jaýapkershiliktiń úlgisin kórsetkenine arnaiy toqtaldy.
«Olardyń kóbi búgingi saltanatty sharaǵa qatysyp otyr. Biz qasiretti qańtar qurbandary men naǵyz qaharmandardy máńgi este saqtaimyz. Bir sózben aitqanda, biz ult bolyp osy qasiretti oqiǵadan sabaq alýymyz kerek. Quqyq qorǵaý organdary jáne arnaýly qurylymdar aýqymdy jumys atqardy. Tergeý barysy depýtattardyń, Bas prokýratýra ókilderiniń jáne zańgerler qaýymynyń qatysýymen Parlamentte talqylandy. Sol kúnderdiń mán-jaiyn jan-jaqty qarastyryp, qamaýǵa alynǵandarǵa zań turǵysynan kómek kórsetý úshin quramyna elimizdiń bedeldi quqyq qorǵaýshylary engen qoǵamdyq komissiialar eleýli úles qosty. Munyń bári bolǵan oqiǵaǵa shynaiy qaraýǵa múmkindik berdi. Nátijesinde jalǵan urandarǵa senip, qylmyskerlerdiń yqpalyna túsken, alaida, aýyr qylmys jasamaǵan azamattarǵa meniń Jarlyǵymmen raqymshylyq jasaldy», – dedi Qasym-Jomart Toqaev.
Prezident sonymen qatar qaraqshylardy, radikaldar men lańkesterdi batyr etip kórsetýdiń qajeti joq ekenin, naǵyz batyrlar – jumysshylar, fermerler, dárigerler men medbikeler, muǵalimder men oqytýshylar, ǵalymdar men mádeniet qairatkerleri, kásipkerler men sportshylar dep atap ótti.
Prezident sózin qorytyndylai kele qańtar oqiǵasy bárimiz úshin úlken sabaq bolǵanyn jetkizdi.
«Biz qut-berekeniń bastaýy turaqtylyq ekenin uǵyndyq. El tynyshtyǵyn saqtai bilmesek, dúnie bir sátte astań-kesteń bolatynyn kórdik. Táýelsizdigimiz ben memlekettigimizdi kún saiyn qorǵaýymyz qajet ekenin sezindik. «Jaý joq deme, jar astynda» degen sózdiń mánin de jete túsindik. Yntymaq pen birlik bolmasa, basqa jetistiktiń bári beker ekenine kóz jetkizdik. Sondyqtan qańtar qasireti jáne sol kezde ómiri qiylǵan azamattar bizdiń jadymyzda máńgi saqtalady. Biz ult bolyp uiyssaq, kez kelgen qaýip-qaterdi eńsere alamyz. Men Prezident retinde memleketimizdiń tutastyǵyn jáne halqymyzdyń amandyǵyn saqtaý úshin bárin jasaimyn», – dedi Qasym-Jomart Toqaev.
«Taǵzym» memorialy qańtar oqiǵasynyń epitsentri bolǵan jerde salyndy. Respýblika alańy halqymyz úshin kieli oryn sanalady. Memorial taǵzym etetin jáne eske alatyn, sondai-aq halqymyzdyń danalyǵyn, batyldyǵy men kúsh-qýatyn kórsetetin orynǵa ainalady.
«Taǵzym» memorialy – kóp satyly sáýlet kesheni. Bul eskertkish ártúrli tústen turatyn tórt emotsionaldy-arhitektýralyq bólikke bólinedi. Atap aitqanda, aqshyl sur bóligi eńserýdi, qara tús qańtar oqiǵasy kezindegi dúrbeleń men úreidi beineleidi, al sur bóligi – qurban bolǵandar men tógilgen qannyń, adam shyǵynynyń simvoly, aq tús turaqtylyq pen damýǵa umtylýdy, qoǵamnyń ál-aýqatyn, ulttyń ózin-ózi tanýyn, kúsh pen ádiletti memleketke degen senimdi bildiredi. Ár bólikte halqymyzdyń uly tulǵalarynyń qanatty sózderi jazylǵan tastar men stellalar ornatylǵan.
Jobanyń avtorlary – qazaqstandyq jas sáýletshiler Aleksei Ivjenko jáne Ǵaini Saǵidýllaeva.
