© Aqtóbe oblystyq perinataldyq ortalyǵy
Aqtóbe oblysynda "Ańsaǵan sábi" baǵdarlamasy boiynsha Qasym, Jomart, Kemel esimdi úshem dúniege keldi. Dárigerlerdiń aitýynsha, qazir sábilerdiń densaýlyǵy qalypty, dep habarlaidy Sputnik Qazaqstan.
Aqtóbe oblystyq perinataldyq ortalyǵy baspasóz qyzmetiniń málimetine súiensek, 36 jastaǵy Qarlyǵash esimdi turǵyn EKU arqyly úsh balanyń anasy atandy. Ol merziminen buryn – júktiliktiń 36-shy aptasynda bosanǵan.
Nárestelerdiń salmaǵy – 2 keli 620 gramm, 2 keli 270 gramm jáne 1 keli 925 gramm. Úshemniń ata-anasy Mirat pen Qarlyǵashtyń 13 jastaǵy qyzy bar. Qazirgi ýaqytta qyzdary inilerimen qaýyshatyn kúndi asyǵa kútýde.
"Úshem jansaqtaý bóliminen anasynyń janyna aýystyryldy. "Shala týylǵan sábi kútimi" bóliminde kútimniń ekinshi kezeńinen ótýde. Otbasyly jandardyń EKU-ǵa júginýiniń basty sebebi – ártúrli etiologiiaǵa bailanysty uzaq ýaqyt boiy bala kótere almaýy. Mirat pen Qarlyǵash júktiliktiń bastalýymen qaitalama máselelerdiń oryn alýyna bailanysty qosalqy reprodýktivti tehnologiialarǵa júgindi. Erli-zaiyptylar "Ańsaǵan sábi" baǵdarlamasynyń barlyq kriteriilerine sáikes kelgendikten, kvota birden berildi", – deidi oblystyq perinataldy ortalyq direktorynyń orynbasary Andrei Gaidai.
Aitýynsha, kóp uryqty júktilik bastapqyda asqynýdyń úlken qaýpin týdyrady. Qarlyǵash óziniń júktiligine óte muqiiat jáne úlken jaýapkershilikpen qarady. Usynylǵan mamandarǵa baryp, qajetti ýltradybystyq skriningter men tekserýlerden ýaqytynda ótti. Nátijesinde asqynýlardyń barlyq táýekelderin azaitýǵa jáne júktiliktiń qolaily aǵymyna qol jetkizdi.
"Anasy men úshemdi úiine shyǵarý kóptegen faktorlarǵa bailanysty. Osy oraida bizdiń mamandardyń negizgi mindeti – dene salmaǵynyń dinamikalyq ósýine, nárestelerdiń emshek sútimen jetkilikti tamaqtanýyna, dene temperatýrasyn turaqty ustap turýǵa, ananyń jańa týǵan nárestelerge kútim jasaý jáne emizý daǵdylaryn igerýine kóz jetkizý. Apta sońyna qarai biz ana men jańa týǵan nárestelerdi shyǵarýdy josparlap otyrmyz, – deidi dáriger.
Sondai-aq Andrei Nikolaevich Mirat pen Qarlyǵash úshemniń ata-anasy bolatynyn estigen sátte qatty tolqyǵanyn jetkizdi. Olardy júktilik qalai ótedi, sábilerdiń densaýlyq jaǵdaiy qalai bolady degen suraqtar mazalaǵan. Osy oraida perinataldy ortalyqtyń dárigerleri barynsha qoldap, meditsinalyq jáne psihologiialyq turǵyda kómek kórsetti.
"Úshemniń ata-anasy erte bosanýdyń aldyn alý, bala kútimi, olardy tamaqtandyrýǵa qatysty suraqtar kóp qoidy. Biz óz tarapymyzdan barlyǵyn egjei-tegjeili túsindirip berdik. Jańa oblystyq perinataldy ortalyǵynda úshemniń dúniege kelýi – biz úshin qýanyshty jańalyqtyń biri. Odan bólek sábilerge Qasym, Jomart, Kemel degen esim bergenin estigende tańǵalǵanymyzdy jasyra almadyq. Jáne Jańa Qazaqstannyń damýymen bailanysty ekenine qýandyq", – dep sózin qorytyndylady Andrei Gaidai.
Aita keterligi, Aqtóbe oblysynda sońǵy ret úshem osydan 1,5 jyl buryn dúniege kelgen.
