«Qazaqfilm» aýqymdy tarihi kinojobaǵa kasting jariialady, dep habarlaidy "Ult aqparat" kinostýdiianyń baspasóz qyzmetine silteme jasap.
Atalǵan kinotýyndyny QR Mádeniet jáne sport ministrligi tapsyrysy boiynsha Sh.Aimanov atyndaǵy «Qazaqfilm» AQ túsiredi.
Kinojoba qazaqtyń uly handarynyń biri - Qasym hannyń ómiri týraly baiandaidy.
«Filmniń kórkemdik jetekshisi - «Ertuǵyryl» serialyn túsirip jatqan túrik rejisseri Metin Giýnai. Basty rólderge, qosalqy jáne epizodtyq rólderge 3 jáne 80 jas aralyǵyndaǵy barlyq qazaqstandyqtar (balalar, er adamdar men áielder) qatysa alady (er azamattardyń boiy 180 sm. kem bolmaýy tiis).Basty talap - qazaq tilinde erkin sóileýi kerek. Kasting Qazaqstan boiynsha ótedi», - delingen habarlamada.
Almaty qalasynda kasting jumystary 25 qańtardan bastalady.
Kastingke qatysý úshin kazakhfilmcast@gmail.com elektrondy poshtasyna kelesi aqparattardy: jaqynnan bet boiaýsyz, kózildiriksiz jáne linzasyz, bas kiimsiz, óńdelmegen fotosýretterdi (selfi emes), sondai-aq tula boiy kórinetin bir sýret, jáne ózi týraly qysqasha aqparatty (aty-jóni, jasy, boiy men salmaǵy, bilimi jáne kinodaǵy tájiribie týraly) joldaý kerek.
«Qurmetti áielder qaýymy! Kastingke bet boiaýsyz jáne jasandy kirpiksiz kelýlerińizdi suraimyz. Tatýajy bar qyz-kelinshekterdi qabyldamaimyz», - dep eskertedi kinostýdiiadan.
Eske sala ketsek, QR Mádeniet jáne sport ministri Arystanbek Muhamediuly Qasym han týraly filmniń stsenariii jazylyp jatqanyn byltyr habarlaǵan bolatyn.
«Qasym han týraly filmniń jobasy boiynsha biz kartinanyń stsenariiine tapsyrys berdik. Álbette, ol stsenariidiń qalai jazylǵanyna den qoiarymyz anyq. Eger onda Qasym hannyń barlyq erligi men ómiri qamtylmasa, ary qarai jumysty jalǵastyratyn bolamyz. Rejisser - «Ertuǵyryl» serialyn túsirgen túrik rejisseri bolady. Ol qazaqstandyq mamandarmen birge stsenariidi jazyp shyqty. Qazirgi tańda qazaqstandyq rejisserler iri jobalarmen júr. Aqan Sataev «Tumar patshaiymdy» túsirip jatsa, Rústem Ábdirash «Almas Qylyshty» jalǵasyna kirisip ketti. Álemdik deńgeige jetý úshin biz moiyndalǵan rejisserler men avtorlardy shaqyrýymyz kerek», - degen edi Arystanbek Muhamediuly.
