Kaspii mańyndaǵy bes memlekettiń prezidenti Kaspii teńiziniń quqyqtyq mártebesi týraly konventsiiaǵa qol qoidy. Bul qujat teńizdiń asty men ústin bólý týraly máselege núkte qoiyp otyr.
Atap aitqanda, qujat birqatar erejelerdi qamtidy. Qujatty Qazaqstan, Ázerbaijan, Resei, Iran jáne Túrikmenstan prezidentteri bekitti.
«Barlyqtaryńyzdy mańyzdy qujatqa qol qoiylýymen quttyqtaimyn. Biz áriptesterimizben birge Kaspii teńiziniń quqyqtyq mártebesin retteý boiynsha kóp jyldyq jumystyń qorytyndysyn jasadyq», - dedi QR Prezidenti Nursultan Nazarbaev.
Osy oraida Elbasy barlyq bes memleket te teńizdiń quqyqtyq rejimin aiqyndaýǵa kúsh-jiger salǵanyn qadap aitty.
«Konventsiiany daiarlaý protsesinde barlyq elder saiasi turaqtylyqty qamtamasyz etý, Kaspii óńirin damytý, onyń tabiǵi bailyǵyn saqtaý siiaqty múddeni ustandy. Konventsiia - Kaspii teńiziniń Konstitýtsiiasy ispetti. Ol teńiz mańy elderiniń quqyqtary men mindettemelerine qatysty máselelerdiń barlyq keshenin retteýge negizdelgen. Sondai-aq, qujat jalpy óńir qaýipsizdiginiń, turaqtylyǵynyń jáne gúldenýiniń kepilgeri bolýǵa arnalǵan», - dep naqtylady Qazaqstan Prezidenti.
Aita keteiik, Resei prezidenti Vladimir Pýtin atalǵan konventsiia konsensýs pen múddelerdi ózara eskere otyryp, zamanaýi ári teńdestirilgen halyqaralyq qujat ekenin atap ótti.
«Konventsiia qajetti jikteý sharalaryn, kemeniń júzýi men balyq aýlaý rejimderin aiqyn reglamentteidi, qatysýshy elderdiń áskeri-saiasi ózara is-qimylynyń ustanymdaryn belgileidi. Sonymen qatar, Kaspiidi tek beibit maqsattarda paidalanýǵa kepildik berilgen», - dedi RF basshysy.
Bes eldiń prezidenti Kaspii teńizi ústiniń negizgi aýmaǵy memleketterdiń ortaq paidalanýynda qalady dep kelisti. Teńizdiń túbi men bailyǵy kórshi memleketter arasynda halyqaralyq quqyq negizinde ýchaskelerge bólinedi dep sheshildi.
Budan bólek taraptar keme qatynasy, balyq aýlaý, ǵylymi zertteýler júrgizý jáne magistraldyq qubyrlar tartý erejeleri boiynsha kelisimge keldi. Barlyq jumys ekologiialyq qaýipsizdik jaǵy eskerilip júrgizilýi tiis.
Konventsiiaǵa sáikes, Kaspiide óńirlik derjavalardan bólek basqa elderdiń qarýly kúshteriniń bolýyna jol berilmeidi.
Teńizdegi qaýipsizdikti qamtamasyz etý jáne ondaǵy resýrstardy basqarý jaýapkershiligi konventsiiaǵa qatysýshy elderdiń moinyna júkteledi.
