Parlament Májilisiniń jalpy otyrysynda palata depýtattary «Sýǵa batyp ketken kemelerdi joiý týraly 2007 jylǵy Nairobi halyqaralyq konventsiiasyn ratifikatsiialaý týraly» zań jobasyn maquldady, dep habarlaidy QazAqparat.
Konventsiia Halyqaralyq teńiz uiymynyń bastamasymen qabyldandy. Bul qujatqa 53 memleket qosylǵan. Konventsiianyń negizgi maqsaty - sýǵa batyp ketken kemelerdi tez ári tiimdi alyp shyǵý jáne apat saldaryn joiýdyń biryńǵai qaǵidalary men rásimderin engizý.
«Konventsiiada teńiz apaty kezinde bolǵan zalaldy qarjylai óteýdi kepildendirý boiynsha keme iesiniń jáne týdy kóterip júzetin memlekettiń mindetteri bekitilgen. Qujatty ratifikatsiialaý qajettiligi Kaspii teńizinde keme qatynasynyń artýyna bailanysty týyndap otyr. Bul rette Qazaqstan - negizgi júk quraýshy memleket. Kaspii teńizinde jalpy júk ainalymynyń shamamen 31 paiyzy Aqtaý jáne Quryq porttarynda tieledi. Búgingi tańda biz Transkaspii halyqaralyq kólik dálizin belsendi túrde damytyp kelemiz. Irannyń Kaspii mańy porttarymen jańa avtomobil-parom qatynasy ashyldy. 2021 jyly Reseidiń Mahachkala portymen temirjol-parom qatynasyn ashý josparlanyp otyr», - dedi QR Indýstriia jáne infraqurylymdyq damý ministri Beibit Atamqulov.
Aqtaý jáne Túrkmenbashy porttary men Irannyń Amirabad porty arasynda turaqty konteinerlik jeliler iske qosyldy.
«Jalpy alǵanda, 2025 jylǵa qarai Kaspii teńiziniń qazaqstandyq sektoryna kiretin kemeler sany eki esege ulǵaiady. Tiisinshe teńiz apattarynyń bolý táýekeli artady», - dedi ministr.
Onyń aitýynsha, konventsiiany ratifikatsiialaý teńiz apattary bolǵan kezde Qazaqstannyń múddelerin qorǵaý úshin qajetti jaǵdailar jasaidy. Birinshiden, elimizdiń sýlaryna kiretin keme ieleriniń óz jaýapkershiligin saqtandyrý nemese sýǵa batqan kemeni alyp shyǵarý mindetin belgileidi. Bul Qazaqstanǵa kemeni kóterý shyǵyndaryn óteýdi tikelei saqtandyrý kompaniiasynan talap etýge múmkindik beredi.
Ekinshiden, týyn kóterip júzetin memlekettiń teńiz ákimshiliginen kemeni kóterý jáne apat saldaryn joiý mindetterin oryndaýdy saqtandyrý týraly kýálik túrinde kepildik alady.
Úshinshiden, teńiz apaty bolǵan jaǵdaida Qazaqstannyń teńiz ákimshiliginiń, keme iesiniń jáne sheteldik kemeniń teńiz ákimshiliginiń is-qimyl tártibin anyqtaidy.
