"Búgingi ýaqytta Mańǵystaý oblysynda teńiz sýyn tushylaityn zaýyttyń qurylysyn júzege asyratyn 3 investordyń biri anyqtaldy. Bul týraly búgin Ortalyq kommýnikatsiialar qyzmetinde ótken brifingte Mańǵystaý oblysy indýstrialdyq-innovatsiialyq damý basqarmasynyń basshysy Nurbek Qarasaev málim etti", - dep habarlaidy Ult.kz tilshisi QazAqparat agenttigine silteme jasap.
«Oblysta teńiz sýyn aýyzsýǵa ainaldyratyn zaýytty salýǵa investorlardy izdeý jumystary qarqyndy júrip jatyr. Jańaózen turǵyndaryn aýyzsýmen qamtamasyz etetin Kendirli mańyndaǵy teńiz sýyn tushylaityn zaýyttyń investorlary anyqtaldy», - dedi Qarasaev tilshilerdiń saýalyna bergen jaýabynda.
Keiin, tilshilerge jeke suhbat bergen ol, atalmysh joba eger eki tarap 2,5 jylda kelisimge kelgen jaǵdaida ǵana júzege asyrylatynyn atap ótti.
«Zaýyt qýaty men joba quny týraly qazir men aita almaimyn. Sebebi qazir tek investor tabyldy. Bul nysandy «QazMunaiGaz» retteidi. Sebebi ol «JańaózenMunaiGaz» kompaniiasymen birge qolǵa alynyp otyrǵan jumys. Qazirgi kezde QMG úsh investordyń birin tańdap aldy. Eger olar investitsiialyq kelisimge qol qoiatyn bolsa, onda bul 2,5 jyldyń jumysy», - dedi ol.
Sý tushylaityn zaýyt Kaspii jaǵasyna jaqyn tusta, Mańǵystaý oblysy Qaraqiia aýdanynda ornalasýy múmkin.
«Teńiz sýyn paidalanatyndyqtan, zaýyt Kaspii mańynda bolatyny qisyndy. Keiin aýyzsýǵa ainalǵan tushy sý qubyrlarmen eldimekenge jetkiziledi. Eń birinshi atalmysh sý «JańaózenMunaiGaz» ben jergilikti halyq úshin jasalyp otyr. Sebebi tushy sý bul aimaqta tapshy», - dedi Qarasaev.
