Atyraý oblysynda 5 kún boiy jalyndaǵan dala órti sóndirildi. Bul týraly QR Tótenshe jaǵdailar ministrliginiń baspasóz qyzmeti habarlady.
«Órtpen kúreske Atyraý oblysy Tótenshe jaǵdai departamentiniń 49 qyzmetkeri, 7 tehnikasy men «Qazaviaqutqarý» AQ tikushaǵy jumyldyryldy. Jumys barysynda tikushaq 87 tonna kóleminde 29 ret sý shashty», - dedi ministrlikten.
Eske sala ketsek, búgin ǵana Kaspii jaǵalaýy 5 kúnnen beri órtenip jatqany habarlanǵan bolatyn.
10 qazanda kúndiz Atyraý qalasynyń Keńózek aýyldyq okrýginde Kaspii teńizi jaǵalaýynyń batpaqty jerinde qamys tutanǵan bolatyn. Órt oshaqtary anyqtalǵannan keiin dereý oqiǵa ornyna órt sóndirýshiler jiberilgen edi. 5 kún boiy órt sóndirýshiler jeldiń kúsheiýine, sondai-aq batpaqty jermen jáne ósimdikterdiń qalyń ósýine bailanysty qiyn jaǵdailarda otpen kúresti. Tehnikanyń ótý qiyndyǵynan jalyndy sóndirýge aviatsiia paidalanyldy.
