Búgin jergilikti turǵyndar Mańǵystaý oblystyq Orman sharýashylyǵy jáne janýarlar dúniesi aimaqtyq inspektsiiasyna itbalyqtardyń qyrylyp jatqany týraly málimdegen, dep habarlaidy "Ult aqparat" Orman sharýashylyǵy jáne janýarlar dúniesi komitetiniń baspasóz hatshysy Sáken Dildahmetke silteme jasap.
Inspektsiia qyzmetkerleri jedel túrde 1, 7 jáne 15-shi yqshamaýdandardaǵy Kaspii teńiziniń jaǵalaýyna jetip, 3 kaspii itbalyǵyn tapqan.
Qaraý barysynda sý janýarlary shamamen kúz kezinde ólgeni belgili boldy.
Dene qatty buzylyp ketkendikten synama alý múmkin bolmady.
Teńiz jaǵalaýy men sýda budan ózge itbalyq ushasy jáne munai ónimderi men lastaýshy zattar tabylmady.
Oblystyq inspektsiia memlekettik inspektorlary monitoring jumystaryn júrgizip jatyr.
