Foto: Informburo.kz
Premer-ministr Oljas Bektenov Kaspii teńizi problemalaryn keshendi zertteý jónindegi Memleket basshysynyń tapsyrmasyn oryndaý aiasynda Úkimet rezervinen 305 mln teńge bólý týraly qaýlyǵa qol qoidy, dep habarlaidy Ult.kz.
Qarjy «Qazaq Kaspii teńizi ǵylymi-zertteý institýty» KeAQ-tyń jumysyn damytýǵa baǵyttalady. Bul mekeme Prezident Qasym-Jomart Toqaevtyń tapsyrmasymen Kaspiidiń ekologiialyq jaǵdaiyn zertteý úshin qurylǵan.
Institýt balyq qorynyń kólemin baǵalaý, olardy saqtaý ádisterin ázirleý, ihtiofaýnany zertteý, itbalyqtardyń jappai qyrylý sebepterin anyqtaý jáne popýliatsiiany saqtaý jumystaryn júrgizedi. Sondai-aq teńizdiń gidrologiialyq úderisterin, deńgeiin, klimattyń ózgerýin, sýdyń sapasyn jáne biologiialyq alýantúrliligin baqylaý da – basty mindetterdiń qatarynda.
Bólingen qarjy gidrobiologiia, gidrohimiia, gidrometeorologiia jáne spýtniktik monitoring zerthanalaryndaǵy ǵylymi-zertteý jumystaryn ýaqtyly ári tiimdi atqarýǵa múmkindik beredi.
12 tamyzda Qazaqstanda, sondai-aq Kaspii mańy memleketterinde Kaspii teńizi kúni retinde belgilengen. Bul kún álemdegi eń iri tuiyq sý aidynynyń ekojúiesin saqtaýǵa baǵyttalǵan.
2006 jyly 12 tamyzda Tegeranda Kaspii teńizi men qorshaǵan ortasyn qorǵaý týraly Negizgi konventsiiaǵa qol qoiylyp, ol kúshine endi.
Aita keteiik, Kaspii teńizine shamamen 130 ózen quiady, olardyń negizgi bóligi – Edil, Jaiyq (Oral), Terek, Kýra, Sýlak, Samýr jáne Iran jaǵalaýyndaǵy shaǵyn ózender. Qazaqstan aýmaǵynan teńizge Jaiyq (Oral) ózeni quiady.
«Qazgidromet» RMK teńiz deńgeiine jaǵalaý boiyndaǵy 10 teńizdik gidrometeorologiialyq stantsiia men bekette baqylaý júrgizedi, al sý sapasyn 50 jaǵalaý núktesinde (Soltústik Kaspiide – 22, Orta Kaspiide – 28 núkte) qadaǵalaidy.
Qazaqstan Kaspii teńiziniń teńiz ortasyn qorǵaý jónindegi Tegeran konventsiiasyn iske asyrýǵa belsendi qatysady, ǵylymi zertteýlerdi damyta otyryp, teńizdiń ornyqty bolashaǵyn qamtamasyz etý maqsatynda kórshiles eldermen yntymaqtastyq ornatýda.
