Kaspii itbalyǵy Qazaqstannyń Qyzyl kitabyna engizildi. Búgin QR Ekologiia, geologiia jáne tabiǵi resýrstar ministri Maǵzum Myrzaǵaliev osy máselege qatysty pikirin bildirdi, dep habarlaidy "Ult aqparat".
Ministrdiń sózinshe, Kaspii itbalyǵynyń Qazaqstannyń Qyzyl kitabyna enýi janýardyń popýliatsiiasyn saqtap qalýǵa múmkindik beredi.
«QR Úkimetiniń Qaýlysymen Kaspii itbalyǵy Qyzyl kitapqa endi. Bul shara sany sońǵy júz jylda 1 mln-nan 100 myńǵa azaiǵan janýardyń popýliatsiiasyn saqtap qalýǵa múmkindik beredi», - dep jazdy M. Myrzaǵaliev.
Ekologiia ministri janýar popýliatsiiasyn saqtaý úshin qabyldanyp jatqan sharalar týraly da aitty.
«Qazaqstanda teńiz sútqorektisin saqtap qalý boiynsha birqatar shara qabyldanyp jatyr. Ótken jyldan beri Aqtaý qalasynda Kaspii itbalyqtaryn zertteý jáne reabilitatsiialaý Ortalyǵy quryldy. Resei Federatsiiasyndaǵy áriptesterimizben birge zertteý júrgizip, itbalyq popýliatsiiasyn saqtaý boiynsha birlesken áreket etý josparyn ázirlep jatyrmyz», - dedi ministr.
Ol sonymen birge qazaqstandyqtardy joǵalyp bara jatqan janýarlarǵa qamqor bolýǵa shaqyrdy.
«Jaralanǵan itbalyqtardy kórgende joǵaryda atalǵan Ortalyqqa habarlasýlaryńyzdy ótinemiz», - dep jazdy M.Myrzaǵaliev.
Kaspii itbalyǵy basqa Kaspii mańy elderiniń Qyzyl kitaptaryna engizilip qoiǵan.
