Aqtaý qalasy mańyndaǵy Caspian Star demalys bazasynyń jaǵalaýynda ákesi men uly sýǵa batyp kete jazdady. Ókinishke qarai, er adamdy aman alyp qalý múmkin bolmady, dep habarlaidy ult.kz.
Kýágerlerdiń aitýynsha, oqiǵa teńiz jaǵasynda demalyp júrgen áieldiń kómek surap aiqailaýynan bastalǵan. Onyń aitýynsha, teńizde eki adam batyp bara jatqan.
Oqiǵaǵa kýá bolǵan birneshe demalýshy birden sýǵa sekirip, kómekke umtylǵan. Qatty tolqynǵa qaramastan, olardyń biri jasóspirimge jetip, jaǵaǵa alyp shyqqan. Alaida sol kezde onyń ákesiniń áli de sýda qalǵany anyqtalǵan.
Keiin demalýshylar er adamdy da sýdan shyǵaryp úlgergen. Biraq ol jaǵaǵa es-tússiz kúide jetkizildi.
Tótenshe jaǵdai qyzmetkerleri kelgenge deiin demalýshylar óz kúshterimen júrek-ókpe reanimatsiiasyn jasaǵan. Keiin oqiǵa ornyna TJD qyzmetkerleri men jedel meditsinalyq kómektiń eki brigadasy jetti. Dárigerler bir saǵattan astam ýaqyt boiy reanimatsiialyq sharalar júrgizgenimen, er adamnyń ómirin saqtap qalý múmkin bolmady.
Kýágerdiń sózinshe, qaiǵyly jaǵdai qutqarý beketi joq, arnaiy jabdyqtalmaǵan jaǵalaý aýmaǵynda bolǵan. Sonymen qatar, bul jerde uialy bailanys turaqsyz jumys istegendikten, jedel qyzmetterdi shaqyrý men olardyń oqiǵa ornyna jetýi de qiyndaǵan.
