Investorlarmen strategiialyq kelisim jasaýǵa múmkindik beretin investitsiialyq jobalar pýly jasaqtalady. Bul týraly QR Premer-Ministriniń birinshi orynbasary Álihan Smaiylov aitty, dep habarlaidy QazAqparat.
«Investitsiialyq jobalardyń júzege asyrý merzimi boiy zańnamalyq turaqtylyqty qamtamasyz etý úshin Strategiialyq investitsiialyq kelisim engiziledi. Kásipkerlik jáne Salyq kodeksterine, sonymen qatar «Arnaýly ekonomikalyq aimaqtar týraly» Zańǵa túzetýler engiziledi. Investorlarmen strategiialyq kelisim jasaýǵa múmkindik beretin investitsiialyq jobalar pýly jasaqtalady. Árbir iri investor jeke tásilmen qamtamasyz etiledi», - dedi birinshi vitse-premer Úkimet úiindegi baspasóz máslihatynda.
Onyń atap ótýinshe, investitsiialyq jobalardy júzege asyrý protsesinde «Astana» halyqaralyq qarjy ortalyǵynyń áleýeti tolyq qoldanylady.
«Negizgi kapitalǵa salynǵan investitsiia kólemi 2025 jylǵa qarai jalpy ishki ónimniń 30 paiyzyna deiin jetkiziledi», - dedi ol.
Sonymen qatar Úkimet basshysynyń birinshi orynbasary memlekettik basqarý júiesinde oryn alatyn ózgeristerge toqtaldy.
«Memlekettik qyzmetkerler sanyn jáne kvazimemlekettik sektor qyzmetkerlerin qysqartý boiynsha olar osy jyldyń sońyna deiin - 10, kelesi jyly taǵy 15 paiyzǵa qysqarady. Sonymen kelesi jyldyń sońyna deiin olar 25 paiyzǵa deiin qysqarady. Ekonomikada jeke sektordyń kólemin keńeitý úshin jekeshelendirýdiń 2025 jylǵa deiingi jańa jospary qabyldanady», - dedi Álihan Smaiylov.
